Ózbekstanda Enter Engineering kompaniiasy jappai narazylyqtan keiin jumysshylarǵa keshiktirgen jalaqylaryn tólei bastady.
Ózin kompaniiadaǵy narazylyqtyń sebebin zertteý tobynyń múshesi retinde tanystyrǵan ókil 22 qazanda Azat Eýropa/Azattyq radiosyna jumysshylar jalaqysy tólengenin aitty. Keibir jumysshylar Azattyqqa sońǵy úsh aidyń jalaqysyn alǵanyn rastady.
21 qazanda Ózbekstannyń ońtústigindegi Qashqadariia oblysynyń Gýzar aýdanynda Uzbekistan GTL zaýytyn salyp jatqan myńdaǵan jumysshy kompaniianyń ákimshilik ǵimaratyn basyp alyp, búlik shyǵarǵan edi.
Azattyqtyń Ózbek qyzmetiniń qolyna túsken videoda 5 myńǵa jýyq jumysshynyń zaýyt ǵimaratyna kúshpen basyp kirgeni baiqalǵan. Videotaspadan jihazdar men kompiýterlerdiń qirap jatqany kórinedi.
Keibir jumysshylardyń sózine qaraǵanda tártipsizdikti toqtatý úshin Gýzar aýdanyna ulttyq ulan, arnaiy jasaq pen politsiia ákelingen.
Zardap shekkender jaily aqparat jariialanǵan joq.
Aty-jónin atamaǵan jumysshylardyń biri Azattyqqa 20 qazanda jumys berýshi Enter Engineering kompaniiasynyń jumysshylarǵa keshki as bermegenin aitty. Bul onsyz da jalaqysyn almai júrgen jumysshylardy ashýlandyrǵan.
Bas keńsesi Tashkentte ornalasqan kompaniianyń ókiliniń aitýynsha, ashananyń elektrondy qulyptaý júiesi istemei qalǵandyqtan, jumysshylar esikti asha almai, sodan búlik shyqqan.
Jumysshylardyń biri 22 qazanda Azattyqqa jalaqy men tamaq máselesinen bólek búliktiń shyǵýyna karantin sharalary da sebep bolǵanyn aitty. Sol shekteýdiń kesirinen jumysshylardyń kúndelikti jumys kestesi ózgerip, kompaniia basshylyǵy jumysshylardy otbasyna jibermei, qurylys alańynda qonýǵa májbúrlegen.
Ózbekstan bas prokýratýrasynyń resmi ókili Haiot Shamsýtdinov aqparat quraldaryna jaǵdai zerttelip jatyr dep málimdedi.
