Búgin álemge belgili aqyn, ult janashyry, Qazaqstannyń Halyq jazýshysy, Qazaqstannyń Eńbek Eri Muhtar Shahanovtyń 80 jyldyq mereitoiy Otyrar aýdanynda keń kólemde atalyp ótti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Aldymen aqyn bastaǵan bir top ziialy qaýym Arystanbab kesenesine ziiarat jasap, quran baǵyshtady. Sonan soń «Otyrar» memlekettik arheologiialyq mýzei-qoryǵynyń Sapar ortalyǵynda mýzei qyzmetkerlerimen «Otyrar órkenieti jáne Shahanov shyńy» atty kezdesý ótti. Jiynda satirik, jýrnalist Kópen Ámirbek: «Qazaq óleńiniń ulttyq boiaýy men rýhyn ustanyp, ony túrlendire baiyta túsken aqiyq aqynnyń 80 jasqa tolǵan mereitoiy týǵan jeri — Otyrardan bastaý alýy úlken qurmet» dep aqyndy quttyqtady. Al mýzei direktory Jangeldi Mahashov: «Jyr áleminde óz oiy men shyndyǵyn júieli kórkem tilde, aqyndyq biik turǵydan tutas sheberlikpen jyrlaǵan aqynnyń elimizdiń táýelsizdigi men ana tili úshin qosqan eńbegi orasan. Ult rýhaniiatynda erekshe orny bar asa kórnekti tulǵanyń 80 jasqa tolýyna orai mýzei qyzmetkerlerimen kezdesýi biz úshin bir ǵanibet» dei kele, dara tulǵaǵa shapan jaýyp, syi-siiapat tabystady. Kezdesý sońynda aqiyq aqyn qonaqtarǵa aq batasyn berdi.
Otyrar aýdany ákimdiginiń uiymdastyrýymen mádeni shara budan ári aýdandyq mádeniet saraiynda jalǵasyn tapty. Álemge tanymal aqynǵa aýdan turǵyndary aqboz at mingizip, qurmet kórsetti. Sahna tórinde Qazaqstan Jazýshylar odaǵynyń Túrkistan oblystyq filialynyń tóraǵasy Aidar Seidazim keshti júrgizip otyrdy. «Altyn dombyra» iegeri, belgili aitysker Bekarys Shoibekovtyń arnaýymen bastalǵan jiynǵa Qýanysh Aitahanov, Qulbek Ergóbek, Kópen Ámirbek, Jeńisbek Máýlenqulov, Qazybek Isa, Álimjan Qurtaev, Serikjan Seiitjanov, Hanbibi Esenǵaraqyzy, Qalima Jantóreeva, Bekjigit Serdáli syndy el azamattary qatysty. QR Májilis tóraǵasynan, Qyzylorda oblysy ákiminen jáne elimizdiń ár aimaǵynan kelgen jedel quttyqtaýlardan soń sóz alǵan Túrkistan oblysy máslihatynyń hatshysy Qairat Balabiev jyly lebizin bildirdi. Al Oblystyq mádeniet basqarmasy basshysynyń orynbasary Asylhan Temirhan oblys ákiminiń quttyqtaý haty men syi-siiapatyn jetkizdi. Mereitoi keshi Hadisha Shalabaeva bastaǵan ánshilerdiń ónerine ulasty.
