QR Ulttyq bank tóraǵasy Ǵalymjan Pirmatov Úkimet otyrysynda teńge baǵamyn turaqtandyrý baǵytyndaǵy sharalardy atady, dep habarlaidy QazAqparat.
«Geosaiasi jaǵdaidyń shielenisýi jáne Reseige qarsy sanktsiialardyń engizilýi bizdiń ekonomikamyzǵa da yqpalyn tigizýde. Resei rýbliniń aitarlyqtai álsireýi nátijesinde Qazaqstannyń qarjy naryǵyna jasalatyn qysym óse túsýde.
Syrtqy kútpegen ózgeristerdiń teris saldaryn barynsha azaitý úshin Ulttyq Bank infliatsiianyń aitarlyqtai ósý táýekelderin jeńildetýge jáne teńgedegi jinaqtardy qorǵaýǵa jáne eldiń altynvaliýta rezervteriniń oryndy jumsalýyna baǵyttalǵan sharalar toptamasyn iske asyrýda», - dedi Ǵalymjan Pirmatov.
Sondai-aq, ol 24 aqpanda Ulttyq Bank bazalyq stavkany 13,5%-ǵa deiin kóterý jóninde kezekten tys shuǵyl sheshim qabyldaǵanyn eske saldy.
«Bul sheshim ulttyq valiýta men infliatsiia deńgeiine jasalatyn qysymdy tómendetýge, sondai-aq teńgedegi aktivterdiń saqtalýyna baǵyttaldy.
Úkimetpen birge birlesken is-qimyl josparyn iske asyrý tez arada bastalyp ketti. Biýdjet qarajaty esebinen jeke tulǵalardyń teńgedegi depozitteri boiynsha ótemaqy (syilyqaqy) esepteýdi kózdeitin Teńgedegi salymdardy qorǵaý baǵdarlamasy jariialandy.
Bazalyq stavka óskennen keiin halyqtyń teńgedegi salymdary boiynsha Qazaqstannyń depozitterge kepildik berý qory usynys jasaǵan shekti stavkalar da ósti.
Qarjylyq turaqtylyq táýekelderin eskere otyryp, Ulttyq bank ótken aptada 176 mln dollarǵa valiýtalyq interventsiia júrgizdi. Biz interventsiialar týraly aqparatty jedel jariia etemiz», - dedi Ulttyq bank tóraǵasy.
