Foto: inkaraganda.kz
Ónerkásip jáne qurylys ministrligi turǵyn úi jaǵdailaryn jaqsartý úshin birjolǵy zeinetaqy tólemderin paidalanýdyń qoldanystaǵy erejelerine ózgerister engizýdi usynady, dep habarlaidy «Ult aqparat» banktiń baspasóz qyzmetine silteme jasap.
Aǵymdaǵy jyldyń 1 qańtaryndaǵy jaǵdai boiynsha 135 myńǵa jýyq azamat óz qarajatyn birjolǵy zeinetaqy tólemderinen «Otbasy bank» AQ depozitterine jumsady jáne osy ýaqytqa deiin ipotekalyq turǵyn úi qaryzdaryn resimdegen joq.
«Otbasy bank» AQ aqparaty boiynsha turǵyn úi zaemyn alý úshin qajetti bastapqy jarnany jinaqtaýdyń ortasha merzimi alty jyl.
Osyǵan bailanysty, ministrlik azamattardyń turǵyn úi jaǵdailaryn jaqsartý maqsatynda «Otbasy bank» AQ depozitterinde BJT qarajatyn jinaqtaý merzimin 3 jyldan 8 jylǵa deiin ulǵaitýdy usynady. Budan basqa, erli-zaiyptylarǵa «Otbasy banki» AQ depozitterin bir-birine BJT qarajatymen tolyqtyrýǵa múmkindik berý usynylady, - delingen habarlamada.
Sondai-aq, buiryq jobasymen turǵyn úi qurylysy jinaqtary týraly «Otbasy bank» AQ-men shart buzylǵan kezde BJT-men tolyqtyrylǵan soma alýshynyń arnaiy shotyna qaitarylady, ol 20 jumys kúni ishinde osy qarajatty turǵyn úi jaǵdailaryn jaqsartýǵa paidalana alady nemese emdeýge birjolǵy zeinetaqy tólemderin paidalaný qaǵidalaryna sáikes emdeýge jibere alady (2021 jylǵy 15 aqpandaǵy № DSM-18 Ministrdiń buiryǵy).
Turǵyn úi jaǵdailaryn jaqsartý úshin birjolǵy zeinetaqy tólemderin paidalanýdyń qoldanystaǵy erejelerine josparlanǵan túzetýler NQA ashyq derekter portalynda talqylanýda. Barlyq eskertý men usynystar qabyldanǵannan keiin buiryq jobasy múddeli memlekettik organdarǵa kelisýge jiberiletin bolady. Barlyq kelisý protsesi shamamen eki aiǵa sozylady.
