«Otbasy banki» Qarjy naryǵyn retteý jáne damytý agenttiginiń qadaǵalaýynan shyǵarylady, dep habarlaidy QazAqparat.
QR Parlamenti Májilisinde «Qazaqstan Respýblikasynyń keibir zańnamalyq áktilerine turǵyn úi saiasatyn reformalaý máseleleri boiynsha ózgerister men tolyqtyrýlar engizý týraly» Zań jobasyn tanystyrǵan QR Indýstriia jáne infraqurylymdyq damý vitse-ministri Erkebulan Daýylbaev osyndai málimet aitty.
«Zań jobasy sheńberinde «Otbasy Banki» ulttyq damý institýty bolyp qaita qurylýda, onyń negizgi mindeti – respýblika boiynsha azamattardy turǵyn úimen qamtamasyz etý boiynsha turǵyn úi qatynastaryn damytý.
Osyǵan bailanysty Otbasy bankin ekinshi deńgeili bankter júiesinen shyǵarý jáne oǵan turǵyn úige esepke alýdy, qoiýdy jáne ony bólýdi ortalyqtandyryp júzege asyratyn ulttyq damý institýty mártebesin berý kózdelgen.
Otbasy bankiniń quqyqtyq mártebesi Qazaqstan Respýblikasynyń zańnamalyq aktilerimen aiqyndalatyn bolady.
Otbasy banki Qarjy naryǵyn retteý jáne damytý agenttiginiń qadaǵalaýyndaǵy sýbektiler qatarynan shyǵarylatyn bolady», - dedi vitse-ministr.
Onyń aitýyna qaraǵanda, Qarjy naryǵyn retteý jáne damytý agenttigi men Ulttyq Bank qarjylyq qyzmetterdi tutynýshylardyń quqyqtaryn qorǵaý máseleleri boiynsha baqylaý men qadaǵalaýdy saqtaidy.
«Sonymen qatar, Otbasy banki depozitterdi qabyldaý, zańdy jáne jeke tulǵalardyń banktik shottaryn ashý jáne júrgizý, kassalyq operatsiialar, banktik qaryz operatsiialary, salymshylarǵa turǵyn úi, aralyq jáne aldyn ala turǵyn úi qaryzdaryn berý siiaqty Qazaqstan Respýblikasynyń zańnamasynda aiqyndalǵan sheńberde banktik jáne basqa da operatsiialardy agenttiktiń litsenziiasynsyz júzege asyratyn bolady.
Bul rette ýákiletti organnyń ekinshi deńgeidegi bankti bank operatsiialaryn júrgizýge arnalǵan litsenziiadan aiyrý týraly sheshimi kepildik berilgen ótemdi tóleý úshin negiz bolyp tabylatyndyǵyn eskere otyryp, Otbasy bankiniń depozitterge mindetti kepildik berý júiesine qatysýy múmkin emes.
Osyǵan bailanysty, «Otbasy bankinde» ornalastyrylǵan turǵyn úi qurylys jinaq aqshasyna salymdardyń saqtalýyna QR Úkimeti aiqyndaityn mólsherde jáne tártipte memleketpen kepildik berý usynylady», - dedi Erkebulan Daýylbaev.
Vedomstvo ókili usynylyp otyrǵan jańa tetik boiynsha jergilikti atqarýshy organdarda kezekte turǵandardyń aǵymdaǵy bazasy «Otbasy bankine» berilip, jergilikti deńgeide esepke qoiý toqtatylatynyn aitty.
