Foto: QR TSM
Týrizm jáne sport ministrliginde ishki týrizmdi damytýǵa, eldiń týristik áleýetin nasihattaýǵa jáne Qazaqstannyń tsifrly keńistigindegi oń imidjin qalyptastyrýǵa úles qosyp júrgen otandyq trevel-blogerler men kontent-kreatorlar marapattaldy, dep habarlaidy Ult.kz.
Saltanatty rásim barysynda Erbol Myrzabosynov qatysýshylarǵa «Týrizm salasynyń úzdigi» nagradasyn tabystap, Qazaqstannyń týristik baǵyttaryn el ishinde de, halyqaralyq deńgeide de tanytýda tsifrlyq kontent pen zamanaýi medianyń mańyzdy ról atqaratynyn atap ótti.
«Sizderdiń eńbekterińizdiń arqasynda elimiz shetelde keńinen tanylyp keledi, al memleketimizdiń oń imidji el ishinde de, halyqaralyq deńgeide de nyǵaia túsýde. Sol úshin sizderge alǵysymdy bildiremin jáne týrizmdi damytýǵa qatysty sheshimder qabyldaýda tájiribege negizdelgen tásildi jetildirý baǵytynda birlese jumys isteýge shaqyramyn», — dep atap ótti ministr.
Sondai-aq ministr Dastan Muhamedrahymovty @bydastan internet-jobalar men tsifrly kontent salasynda «Oskar» atanyp ketken WIBA Awards 2026 halyqaralyq syilyǵynyń «Úzdik trevel-bloger» ataǵyn jeńip alǵanymen quttyqtady. Sonymen qatar Órken Darhanulynyń @orkeni sapaly qazaqtildi kontentti damytýǵa qosqan úlesi, Talǵat Qanatulynyń @talashin ekologiialyq ári jaýapty týrizm mádenietin nasihattaýy jáne Sáken Daniiarulynyń @saken_kagarov belsendi demalys pen sporttyq týrizmdi damytý baǵytyndaǵy jumysy aityldy.
Eske sala keteiik, biyl mamyr aiynda Týrizm jáne sport ministrligi men Ekologiia jáne tabiǵi resýrstar ministrligi arasynda ekotýrizmdi damytýǵa baǵyttalǵan memorandýmǵa qol qoiyldy. Yntymaqtastyq aiasynda blogerler men dron operatorlaryna týristik kontent ázirleý úshin erekshe qorǵalatyn tabiǵi aýmaqtarǵa jeńildetilgen tártippen kirýge múmkindik beredi.
Sonymen qatar, 2026 jyly Qazaqstanda alǵash ret oqiǵaly týrizmdi damytýǵa jáne sheteldik týristerdi tartýǵa baǵyttalǵan 55 iri is-sharany qamtityn biryńǵai oqiǵalar kúntizbesi jasaqtaldy. Onyń qatarynda «Dámdástúr», «Qyzǵaldaq mura», Sivers almasynyń gúldeý festivali, sondai-aq alda ótetin «Altyn besik – Aqsýat», «Kókmaisa» jáne «Qazynaly Kaspii» festivalderi bar.
Rásim sońynda qatysýshylarǵa biyl Astanada 29 shilde men 9 tamyz aralyǵynda ótetin «Bolashaq oiyndary» týrniri jáne 20-23 tamyz kúnderi Almatyda uiymdastyrylatyn TBEX Asia 2026 halyqaralyq forýmy týraly aityldy. Forýmǵa álemniń túkpir-túkpirinen 200-den astam trevel-bloger men týrizm indýstriiasynyń ókilderi qatysady dep josparlanǵan.
