Óskemende zeinetker órt shyqqan jer úiden 71 jastaǵy qariiany qutqaryp qaldy, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, órt sóndirý qyzmetine shahar kósheleriniń birindegi jeke turǵyn úide órt shyqqany týraly habar túsken. Órt sóndirýshiler oqiǵa ornyna shuǵyl jetti. Anyqtalǵandai, qyzyl jalyn úidiń qabyrǵasy men divandy, jalpy 7 sharshy metr aýmaqty sharpyǵan.
«Qutqarýshylar kelgenge deiin Alǵashqy áskeri daiyndyq pániniń oqytýshysy, QR IIM zeinetkeri Nurbek Tokýshev otqa oranǵan úiden mas kúidegi 1950 jyly týǵan er adamdy alyp shyqqan. Apattar meditsinasy ortalyǵynyń qyzmetkerleri zardap shegýshini qarap shyqty. Aýrýhanaǵa jatqyzýdyń qajeti bolmady, onyń ómirine eshqandai qaýip tónip turǵan joq», - delingen habarlamada.
Aldyn ala málimet boiynsha, órttiń shyǵýyna otty abaisyz paidalaný sebep bolýy múmkin.
