Óskemen qalasynyń ákimi Jaqsylyq Omar Instagram jelisindegi jeke paraqshasyndaǵy jazbasyna pikir qaldyrǵan jeli qoldanýshysyna ne sebepti «osy sóziń úshin jaýap beresiń» dep habarlama jazǵanyn túsindirdi, dep habarlaidy "Ult aqparat".
Sandra_ouz búrkenshik esimdi azamat Óskemen qalasy ákiminiń «osy sóziń úshin jaýap beresiń» dep habarlama jazǵanyn skrinshotqa túsirip jelige jariialady. Onyń aitýynsha, tanysyna shahar basshysy jazbasyna syni pikir qaldyrǵany úshin osyndai habarlama jibergen.
Kóp uzamai Jaqsylyq Omar ne sebepti solai jazǵanyn túsindirdi.
«Keshe áleýmettik jelide meniń jeke basyma qatysty eshqandai faktilerge súienbei, qur emotsiiamen jazylǵan pikirdi kórdim. Meni qala basshysy retinde ekijúzdi dep aiyptaý qorlyq dep sanaimyn. Árine, ózimniń ar-namysyma tigen mundai dálelsiz sózdi eleýsiz qaldyra almaimyn. Onyń ústine, sol adamǵa bireýdi qorlaýdyń jaýapkershiligi bolatyndyǵy týraly eskertkenimde, ol muny qorqytý dep qabyldady. Men árdaiym dáleldi, negizi bar talaptardy tyńdaýǵa daiynmyn. Biraq barlyqtaryńyz siiaqty jeke basyma qatysty qorlyqqa shydamaimyn», - dedi ol.
Ákim óz sózinde jazbasyna pikir qaldyrǵan azamatty zań aiasynda jaýapqa tartqysy keletindigin jetkizdi.
«Mundai qorlyq atqarýshy bilik pen turǵyndar arasyndaǵy tiimdi dialogqa jat. Sizder bul oqiǵaǵa túsinistikpen qarap, obektivti baǵa beredi dep senemin», - dedi Jaqsylyq Omar.
