Almaty oblysynda órtengen kúiinde tabylǵan politsiia maiory Aslan Álserovtiń videosy tarady, dep habarlaidy ult.kz.
Oqiǵaǵa bailanysty kúdikke marqumnyń jubaiy, eki uly jáne olardyń 14 jastaǵy dosy ilingen.
Aita keteiik, marqumnyń áieli de buǵan deiin quqyq qorǵaý salasynda qyzmet atqarǵan. Alaida ol biyl aqpanda jumystan ketken. Týystarynyń aitýynsha, Aslan Álserov otbasynda jii janjal shyǵaryp, áieline birneshe ret kúsh kórsetken. Áieldiń denesindegi jaraqat izderin kórsetip, Bostandyq aýdandyq politsiia basqarmasyna birneshe ret júgingeni, alaida onyń aryzdary boiynsha tiisti shara qabyldanbaǵany aitylyp otyr.
Tergeý nusqasyna sáikes, qaiǵyly oqiǵa bolǵan kúni maior úiine kesh kelgen. Úide ustaranyń júzine qatysty týyndaǵan daý janjalǵa ulasyp, keiin tóbeleske ainalǵan. Osy kezde úige erli-zaiyptylardyń 15 jastaǵy eki uly jáne olardyń 14 jastaǵy dosy kelgen.
Tergeý dereginshe, jasóspirimderdiń biri ákesiniń basynan aýyr zatpen soqqy jasaǵan. Saldarynan er adam esinen tanyp qalǵan. Keiin onyń qol-aiaǵyn kiimmen bailap qoiǵan.
Budan soń kúdiktiler er adamnyń denesin tún ishinde kópqabatty úidiń aýlasynda turǵan kólikke shyǵaryp, kórpe nemese jaimaǵa orap alyp ketken degen boljam bar.
Kólik Almaty oblysynyń Kegen aýdanyndaǵy aýyldardyń biri arqyly ótip, Kókpek–Kóktal–Kegen tasjolynan shamamen jarty shaqyrym jerdegi taýǵa qarai barǵan. Tergeý boljamynsha, marqumnyń denesi sol jerde órtelgen.
Qazirgi ýaqytta marqumnyń jubaiy, eki uly jáne olardyń 14 jastaǵy dosy qamaýǵa alynǵan. Olardyń protsessýaldyq mártebesi boiynsha tergeý áreketteri jalǵasyp jatyr.
Quqyq qorǵaý organdary istiń barlyq mán-jaiyn anyqtap jatyr. Tergeý aiaqtalǵanǵa deiin kúdiktilerdiń kinási sot sheshimimen dáleldenbegenin eskerý qajet.
