Politsiia qyzmetkeri Aslan Álserovke qatysty jańa derekter men marqumnyń videosy áleýmettik jelide tarady, dep habarlaidy ult.kz.
Buǵan deiin habarlanǵandai, Aslan Álserov Almaty qalasy Áýezov aýdandyq politsiia bóliminde qyzmet etken. Qaiǵyly oqiǵa boiynsha tergeý júrip jatyr. Qazirgi ýaqytta marqumnyń jubaiy, eki uly jáne olardyń 14 jastaǵy dosy kúdikti retinde ustalǵan.
Tergeý deregine sáikes, oqiǵa bolǵan kúni politsiia qyzmetkeri úiine kesh kelgen. Úide shyqqan janjal keiin tóbeleske ulasqan. Aldyn ala nusqa boiynsha, jasóspirimderdiń biri er adamnyń basynan aýyr zatpen urǵan bolýy múmkin.
Keiin kúdiktiler es-tússiz jatqan er adamnyń denesin kólikke salyp, Almaty oblysy Kegen aýdanyna qarai alyp ketken degen boljam bar. Tergeý málimetinshe, máiit Kókpek – Kóktal – Kegen tas jolynan taýǵa qarai shamamen jarty shaqyrym jerde órtelgen bolýy múmkin.
Osy oqiǵadan keiin marqumnyń qaryndasy Aqerke Qaliaqparova Instagram paraqshasynda aǵasyn joqtap, áserli jazba jariialady.
“Bárimizdi qorǵap júrgen ardaqty aǵatai... Bul qaraly habardy qabyldaý óte aýyr boldy. Sizdei elge qorǵan bolǵan, árdaiym halyqtyń tynyshtyǵy úshin qyzmet etken azamattyń ómirden ótýi júrekke qatty batty”, – dep jazdy ol.
Sondai-aq ol aǵasyna degen qurmeti men alǵysy sheksiz ekenin aityp, onyń jarqyn beinesi jaqyndarynyń júreginde máńgi saqtalatynyn jetkizdi.
“Qaryndasyńyz retinde sizge degen qurmetim men alǵysym sheksiz. Jyly júzińiz, qarapaiym minezińiz, elge degen adal qyzmetińiz eshqashan umytylmaidy. Sizdiń jarqyn beineńiz árdaiym júregimizde saqtalady. Janyńyz jánnatta bolsyn, aǵatai. Qosh bolyńyz, batyr aǵatai”, – dedi Aqerke Qaliaqparova.
Qazir quqyq qorǵaý organdary oqiǵanyń barlyq mán-jaiyn anyqtap jatyr. Kúdiktilerdiń kinási sotta dáleldenbeiinshe, olar kinásiz dep sanalady.
