Memleket basshysy Qasym-Jomart Toqaev Premer-ministrge «Ortalyq Aziia» halyqaralyq saýda ortalyǵyn tezirek salýdy tapsyrdy, dep habarlaidy QazAqparat.
«Azyq-túlik qaýipsizdigi máselesi ózekti bola tústi. Ol máseleni tehnologiiasy joǵary aýyl sharýashylyǵynsyz jáne básekege qabiletti óńdeýshi óndirissiz sheshý múmkin emes. Bul – aksioma. Byltyrǵy 11 aidyń ishinde azyq-túlik importynyń kólemi 3,6 mlrd dollarǵa jetti. Bul kórsetkish 2019 jylǵy (12 ailyq) kórsetkishtiń ózinen 9 paiyzben ozyp ketip otyr. Onyń ústine AÓK-ty damytýdyń 2017-2021 jyldarǵa arnalǵan memlekettik baǵdarlamasy sheńberindegi deklaratsiialanǵan kórsetkishterge áli de jete almai kelemiz. Byltyr halyqtyń tabysy azaiǵan kezde azyq-túlik baǵasy kerisinshe qymbattai berdi. Memlekettik organdardyń baǵalardy saqtap qalý boiynsha sharalary, sondai-aq saýda jelilerine jeńildetilgen nesie berý – oń nátije bergen joq. Áleýmettik mańyzy bar azyq-túliktiń baǵasy 11 paiyzǵa artty. Jalpy infliatsiianyń ishindegi olardyń úlesi – 60 paiyzǵa jetti. Úkimet naryqtyq mehanizmdi negizge ala otyryp, joǵaryda atalǵan máseleni sheshetin sharalardy qabyldaýy kerek», - dedi Qasym-Jomart Toqaev Úkimettiń keńeitilgen otyrysynda.
Prezident óz sózinde 24 jappai taratý ortalyqtaryn iske qosýdan turatyn Ulttyq taýar ótkizý júiesin tezirek jolǵa qoiýdy júktedi.
«Qazirgi tańda kókónistiń 90 paiyzyn Ózbekstannan importtap otyrmyz. Sonymen qatar bul memlekettiń Reseimen saýda qarym-qatynasy da bizdiń eldiń aýmaǵy arqyly ótedi. Osyǵan bailanysty «Ortalyq Aziia» halyqaralyq saýda-ekonomikalyq ortalyǵynyń jobasy jariialanǵan edi. Bul ortalyq bizneske turaqty túrde aqsha tabýǵa kómektesýi kerek. Al memleket ol arqyly biýldjetti tolyqtyrýy tiis», - dedi ol.
Qasym-Jomart Toqaev bul bastamany kezinde Elbasynyń ózi tapsyrǵanyn, biraq 3 jyldyń ishinde kelissózge qol qoiýdan basqa eshteńe istelmegenin málim etti.
«Premer-ministr bul máseleni jeke baqylaýyna alyp, bul ortalyqty qurý isin tezdetýi kerek. Ol jónindegi qabyldanǵan sharalar jaily bir aidyń ishinde aqparat berińder», - dedi ol.
