Fýtboldan Qazaqstan chempionatynyń segizinshi týrynda Almatynyń «Qairaty» óz alańynda Shymkenttiń «Ordabasy» komandasyn qabyldady, dep habarlaidy "Ult aqparat".
Qos komanda da el birinshiliginde úzdik shyǵýdan úmitker, ásirese, ótken týrda kútpegen jerden «Atyraýǵa» ese jibergen «Qairatqa» sheginer joq edi.
Almatylyqtardyń bapkeri bul joly shabýyl shebinde braziliialyq Vagner Lavqa qosa ýkrainalyq Aderinsola Eseolaǵa úmit artty. Alaida 25-minýtta qonaqtardyń qorǵaýshysyna qarsy dóreki oinaǵan V.Lavqa qaraǵandylyq tóreshi Artem Kýchin áýeli sary, sosyn qyzyl qaǵaz kórsetti.
Shymkenttikter san basymdyǵyna ie bolǵanymen, oiyn tizginin el chempiondary ýysynan shyǵarǵan joq. Aqyry 61-minýtta qarsy shabýyldy qyrǵyzstandyq Gúljigit Alyqulov ádemi uiymdastyryp, Sergei Keilerge pas berdi. Ol aiyp alańynan tabylǵan A.Eseolaǵa syrǵytty. Eseola múmkindigin múlt jibergen joq.
Oiynǵa tyńnan qosylǵan shabýylshylar Shtreli Mamba men Hose Kante de qanjyǵalaryn mailap, esepti 3:0-ge jetkizdi.
Osylaisha 15 upai jinaǵan «Qairat» týrnir kestesinde úshinshi orynǵa kóterildi. «Astana» 20 upaimen kósh bastap kele jatsa, «Taraz» (17 upai) ekinshi orynda tur.
Kelesi týrda «Aqtóbe» - «Astana», «Atyraý» - «Kaspii», «Tobyl» - «Taraz», «Qyzyljar» - «Qairat», «Ordabasy» - «Turan», «Aqjaiyq» - «Jetisý» komandalary ózara kezdesedi.
