Qytai Halyq Respýblikasy eńbek ótilin ózara tanýǵa qatysty kelisimdi rásimdeýge kelispei otyr. Soǵan qaramastan, Qazaqstan atalǵan memleketten keletin qandastyrmyzdyń eńbek ótilin birjaqty tártippen esepteýge ázir, dep habarlaidy QazAqparat tilshisi.
QR Eńbek jáne halyqty áleýmettik qorǵaý ministri Mádina Ábilqasymovanyń aitýynsha, búginde Qytai siiaqty elderden keletin qandastarymyz ózderiniń eńbek ótilin dáleldei almai júredi. Sebebi atalǵan memlekette eńbek ótilin rásimdeýdiń biryńǵai júiesi joq, tipti eńbek kitapshasy da júrgizilmeidi. Al eńbek ótilin dáleldei almaǵannan keiin zeinetaqynyń tolyq mólsherin alý qiyn.
«Negizi, ondai máseleler ekijaqty halyqaralyq kelisimdermen retteledi. Ondaidy «eńbek ótilin ózara taný» dep ataidy. Qazaqstan birqatar memlekettermen osy ispetti kelisimderdi rásimdegen. Biz Qytaiǵa da eńbek ótilin ózara tanýdy usyndyq. Bylaisha aitqanda, biz shetelden keletin qandastyrmyzdyń eńbek ótilin tolyǵymen sanaimyz. Olar da sóitedi. Degenmen, Qytai jaq oǵan kelisemiz degen nietin bildirgen joq. Sol sebepti biz ózimiz eńbek ótilin birjaqty tanýǵa daiynbyz. Sebebi qandastarymyzdyń biraz bóligi sol jaqtan kelip jatady», - dedi M.Ábilqasymova.
Onyń sózine qaraǵanda, endigi másele - eńbek ótilin dáleldeitin qujattardy anyqtaý. Ol eńbek kitapshasy bola ma, jumys berýshiniń resmi haty bola ma, osy jaǵyn rettep alý qajet.
«Qazirgi kezde arnaiy sarapshylar toby Qytai men Mońǵoliia boiynsha jumys istep jatyr. Sebebi atalǵan eki memlekettegi jaǵdai uqsas. Sarapshylar eńbek ótilin dáleldeýdiń formalaryn pysyqtap jatyr. Aldaǵy ýaqytta tiisti zańnamaǵa oralmandardyń eńbek ótilin esepteýge qatysty ózgerister engiziledi», - dep atap kórsetti M.Ábilqasymova.
Aita keteiik, buǵan deiin ministr M.Ábilqasymova oralmandardyń eńbek ótilin esepteýge qatysty arnaiy hatty Qytaiǵa jibergeni jaiynda aitqan bolatyn. Onyń aitýynsha, oralmandardyń eńbek ótilin esepteý máselesi sheshilse, bazalyq zeinetaqy jáne taǵy basqa áleýmettik tólemderdiń ulǵaiǵan mólsherin alýǵa múmkindik bolady. «Oralmandardyń kóbisi Mońǵoliiadan, Qytaidan, Ózbekstannan, Reseiden, tipti Germaniiadan kelip jatyr», - deidi M.Ábilqasymova.
