Foto: Premer-ministrdiń baspasóz qyzmeti
Oraldy tasqynnan qorǵaý sharalaryna elimizdiń basqa óńirlerinen taǵy 500 áskeri qyzmetshi men qutqarýshy jumyldyrylady, dep habarlady úkimettiń baspasóz qyzmeti.
21 sáýir kúni tańerteń Jaiyq ózenindegi sý deńgeii qaýipti mejeden asyp, 8,5 metrdi quraǵan. Ózen sýy jaiylǵan jerge ornalasqan saiajai alaptary sý astynda qalyp, Jaiyq jáne Shaǵan ózenderiniń mańyndaǵy shaǵyn aýdandarǵa sý jetken.
"Qorǵanys qurylystaryn nyǵaitý sharalaryna oblys boiynsha 10,6 myńnan astam adam jáne qala boiynsha 6,4 myń adam, sondai-aq Qazaqstannyń basqa óńirlerinen tartylǵan 2 myńnan astam tehnika jumyldyryldy", - delingen habarlamada.
Vitse-premer Qanat Bozymbaev sharyqtaý shegine jetken sý tasqynymen kúresý úshin Mańǵystaý, Aqtóbe oblystarynan, Astana men Almatydan taǵy 500 áskeri qyzmetshi men qutqarýshyny BQO-ǵa jiberýdi tapsyrdy. Oralǵa TJM jáne Qorǵanys ministrligi boiynsha 200 adam kelip, jumysqa kirisip ketti.
Qanat Bozymbaev Oraldyń perimetri boiynsha sý tasqynyna qarsy qorǵanys qurylystaryn tekserdi. Sý tasqynynyń sharyqtaý shegi uzarady degen boljam bar, osyǵan bailanysty vitse-premer sý basý qaýpi bar aimaqtaǵy ózenderdiń boiyndaǵy topyraq bógetterin taǵy birneshe metrge kóterýdi tapsyrdy.
BQO aýyldyq eldi mekenderinde jaǵdai turaqty jáne baqylaýda. Sý tasqyny kezeńi bastalǵaly óńirdegi Jaiyq jáne Shaǵan ózenderiniń boiynda 136 shaqyrymnan astam bóget salynyp, onyń ishinde Oral qalasynda 45 shaqyrymdy qurady.
