Foto: QR Úkimeti
Batys Qazaqstan oblysynda tirshilikti qamtamasyz etetin nysandardy qorǵaý sharalary kúsheitildi. Atap aitqanda, Oralda «Batys sý arnasy» JShS, «Jaiyqjylýenergo» AQ nysandary men sorǵylaý stansasynda sý tasqynyna qarsy jumystar uiymdastyryldy, dep habarlaidy «Ult aqparat» Úkimettiń baspasóz qyzmetine silteme jasap.
Oral qalasynda sýmen jabdyqtaý jumysy 2 túrli kózden júzege asyrylady: jer asty sýlary men Jaiyq ózeni arqyly.
Qalanyń 340 myń halqyn sýmen qamtamasyz etetin «Batys sý arnasy» kommýnaldy kásiporny qazir qalypty rejimde jumys istep tur.
Máselen, qajetti sý men ony tazalaýǵa arnalǵan reagentter qory jetkilikti deńgeide. Apatty brigadalar, kásiporynnyń 820 qyzmetkeri men 82 arnaiy tehnika daiyn tur.
«Jaiyq ózeni boiyndaǵy strategiialyq nysandardy tasqynnan qorǵaý úshin bógetti nyǵaitý boiynsha jumystar júrgizilip jatyr. Qala turǵyndaryn sýmen qamtamasyz etý jumystary aldyn ala qolǵa alynǵan. Sý tasityn arnaiy kólik qarastyrylǵan», — dedi «Batys sý arnasynyń» bas injeneri Aian Tasqali.
«Jaiyqjylýenergosyna» 248 shaqyrymnan astam qalalyq jylý júiesi qaraidy.
Atalǵan nysandardyń aýmaǵynda, onyń ishinde asa qaýipti ýchaskelerde sý tasqynyna qarsy jumys aiasynda qum-qiyrshyq tas qospasymen toltyrý amaldary kúsheitildi.
Tiisti jumystarǵan 180 adam men 15 arnaiy tehnika jumyldyrylyp otyr.
Tutastai alǵanda Batys Qazaqstanda barlyǵy 20 myń shaqyrymnan astam elektr jelisi bar.
Aitalyq, tórt aýdanda 20-dan astam, sondai-aq Oral qalasynda 16 qosalqy stansa jumys istep tur.
Olar qyrda ornalasqandyqtan sý basý qaýpi joq.
Buǵan qosa preventivti amaldar qolǵa alynyp, shahardaǵy eki qosalqy stansada qap tóseý, qorǵanys úiindisin ornatý jumystary qarqyn aldy.
Sonymen birge apatty brigadalar, 1400 qyzmetker men 140 arnaiy tehnika daiyn tur.
Osy rette Jaiyq ózeninde ornalasqan sorǵy stansasyn qorǵaý sharalary da qabyldanǵanyn aita keteiik.
«Jaiyq ózeniniń jaǵasynda «Jaiyqjylýenergo» mekemesin sýmen, sondai-aq qala halqyn aýyz sýmen qamtamasyz etetin sorǵy stansasy bar. Odan kúndelikti shamamen 60 myń tekshe metr sý alamyz. Bul strategiialyq nysan bolyp sanalady. Sondyqtan onyń ainalasyna qap tósep jatyrmyz», —dedi Energetika jáne TKSh basqarmasy basshysy Miras Múlkái.
Esterińizge sala keteiik, Batys Qazaqstan óńirinde aldaǵy sý tasqynyna daiyndyq aiasynda qajetti kúsh jumyldyryldy.
Óńirde sý tasqynyna qarsy is-sharalarǵa barlyǵy 6,3 myńnan astam adam jáne 1,5 myń tehnika tartylyp otyr.
Turǵyn úi alaptaryn nyǵaitý boiynsha sharalar qabyldanýda.
