Oral qalasynda nan baǵasy qymbattady, dep habarlaidy "Ult aqparat".
Qazirgi kezde qala dúkenderinde joǵary surypty nan bólkesiniń baǵasy 119 teńgege jetti.
Bólkeniń 19 teńgege qymbattaýy astyq baǵasynyń joǵarylaýyna bailanysty bolyp otyr.
Oral qalasy ákimdiginen túsken málimetke qaraǵanda, birinshi surypty unnan pisirilgen nan baǵasy ózgerissiz qaldy. Mundai bólkeniń baǵasy – 80 teńge.
Birinshi surypty nan QR Úkimeti 2010 jylǵy 1 naýryzdaǵy №145 qaýlysymen bekitilgen áleýmettik mańyzy bar azyq-túlik taýarlarynyń tizimine engizilgen. Memleket QR Kásipkerlik kodeksi 116-baby 3-bóligi 1-tarmaqshasyna sáikes osy tizimge engizilgen 19 taǵam túriniń baǵasyn retteidi. Sondyqtan birinshi surypty nan baǵasynyń kóterilýi kútilip otyrǵan joq.
Joǵary surypty nan baǵasy oblys ortalyǵynan shalǵai ornalasqan aýdandardyń biri – Bókei ordasynda da ósti. Turǵyndardyń sózine qaraǵanda, munda aq nannyń quny buryn - 140 teńge bolsa, qazirgi tańda - 160 teńge, kei dúkenderde - 170 teńgeden satylýda.
