Oralda kúishi-kompozitor Dáýletkerei Shyǵaiulynyń 200, asa kórnekti oryndaýshy Naýsha Bókeihanovtyń 150 jyldyǵyna arnalǵan «Kúmbirlegen kúmis kúi» respýblikalyq dombyrashylar baiqaýy márege jetti, dep habarlaidy "Ult aqparat".
Oblystyq halyq shyǵarmashylyǵy ortalyǵy uiymdastyrǵan kúi saiysyna Almaty qalasy, Mańǵystaý (Jańaózen), Atyraý, Qyzylorda jáne Batys Qazaqstan oblystarynan barlyǵy 14 úmitker qatysty.
Dombyrashylar eki kúnge sozylǵan, úsh kezeńnen turatyn baiqaý barysynda Dáýletkerei, Naýsha jáne Qurmanǵazynyń kúilerin oryndady. Sońǵy kezeńde olardy Ǵ.Qurmanǵaliev atyndaǵy Batys Qazaqstan oblystyq filarmoniiasy Dáýletkerei atyndaǵy ult aspaptar orkestri (bas dirijery ári kórkemdik jetekshisi Erkin Nurymbetov) súiemeldedi.
Respýblikaǵa tanymal dombyrashy, Qazaqstannyń eńbek sińirgen mádeniet qyzmetkeri Ermek Qaziev bastaǵan qazylar alqasynyń sheshimimen bas júlde (500 myń teńge) atyraýlyq Jánibek Jámievke buiyrdy.
Almatylyq Nazerke Bazarbaeva birinshi (300 myń teńge), atyraýlyq Qairat Jumaǵaliev pen taǵy bir almatylyq Aqylbek Bektasov ekinshi (150 myń teńge), almatylyq Azamat Shynarov pen oraldyq Nargiza Kasýmova úshinshi (75 myń teńge) orynǵa ie boldy.
Qazaq mýzykasynyń altyn qoryna Mahambet, Qurmanǵazy, Naqysh, Músiráli, Soqyr Esjan, Qojaqtyń kúilerin bergen sheber oryndaýshy, Mahambet atyndaǵy syilyqtyń jáne «Halyq kúishisi» ataǵynyń iegeri Ótegen Jumashevtiń osy kúnderi 90 jasqa tolýyna orai arnaiy syilyq (100 myń teńge) belgilendi. Ol qyzylordalyq Baýyrjan Seidáliniń enshisinde ketti. Al oraldyqtar Álibek Qýanysháliev pen Ádilbek Qodarov diplomant atandy (25 myń teńge).
«Tóre mektebiniń negizin qalaǵan, lirikalyq syrly sazdarymen eliniń júregin terbegen Dáýletkereidiń kúishilik murasy han tuqymynan bolǵandyqtan, keńes dáýirinde qýǵyndalsa da, halyq jadynan joǵalǵan joq. Onyń kúilerin ótken ǵasyrda Naýsha Bókeihanov jetkizse, akademik Ahmet Jubanov amanattaǵan dástúrdi biz jalǵastyryp kelemiz. Dáýletkereidiń 200 jyldyǵy keń kólemde atalyp ótilýi tiis edi. Indetke bailanysty kórermendersiz boldy. Baiqaýda Dáýletkereidiń kópten oryndalmai kelgen kúileri tartylyp jatyr. Bul – qýanysh, jaqsylyq, osyndai izdenisterimizdi jalǵastyra berýimiz kerek», dedi Almatydan arnaiy kelgen Qazaqstannyń eńbek sińirgen qairatkeri, Mahambet atyndaǵy syilyqtyń iegeri, professor, Dáýletkerei kúilerin notaǵa túsirip, zerttegen Kárima Saharbaeva.
