17 qyrkúiekte Oral qalasynyń ákimshilik soty qalaǵa jas tilshilerge arnalǵan treningke qatysý úshin Kievten kelgen jýrnalist Aleksandr Gorohovskiige aiyppul saldy. Sot Gorohovskii "Sheteldiktiń nemese azamattyǵy joq adamnyń Qazaqstanda halyqtyń kóshi-qon salasyndaǵy zańnamasyn" buzdy dep sanaidy.
Sýdia Hatima Ersenova ýkrainalyq jýrnaliske 60 myń 125 teńge (25 ailyq eseptik kórsetkish) kóleminde aiyppul saldy. Keiin bul soma 30 paiyzǵa azaitylyp, jýrnalist 42 myń teńge tóleýge mindetteldi.
17 qyrkúiek túske deiin bolǵan sot protsesinde Aleksandr Gorohovskii óziniń tájiribe almasý maqsatynda "Ýralskaia nedelia" basylymynyń shaqyrtýymen kelgenin aitty. Onyń sózinshe, kezdesý pikir almasý jaǵdaiynda ótken jáne eshqandai aqshalai syiaqy týraly sóz bolmaǵan. Gorohovskii "seminar" sózin politseiler oilap tapqanyn aitady.
Sot zalynda politsiia kýáger dep ákelgen Talǵat Qataýov degen adam sóiledi. Ony politsiia oraldyq qonaqúilerdiń birinde "Ýkrainaǵa qatysty seminar bolyp jatyr" dep habarlaǵan "derekkóz" deidi. Qataýovtyń sózinshe, ol politsiiaǵa eshteńe habarlamaǵan. "Seminar" jaily múldem beihabar, al Aleksandr Gorohovskii týraly buryn estimegen. Al óziniń esimi iste bar ekenin tanystarynan estigen.
Gorohovskiidi shaqyrǵan oraldyq jýrnalist Luqpan Ahmediiarov "Jýrnalistika mektebi" ekinshi jyl ótip jatqanyn aitty. Ol bul dáristerdiń tegin uiymdastyrylatynyn atap ótti.
15 qyrkúiekte Oraldaǵy qonaq úilerdiń birinde ótip jatqan "Jýrnalistika mektebi" jobasy aiasyndaǵy jastarǵa arnalǵan sharaǵa Gorohovskii de qatysqan. Jiyn ótip jatqan jerge kelgen eki politsiia qyzmetkeri kelip, osy qonaq úide "zańsyz konferentsiia" ótip jatqany týraly belgisiz bireý telefon soqqanyn habarlady.
Politsiia qyzmetkerleri Ýkraina azamaty Aleksandr Gorohovskiidiń qujattaryn tekserip, onyń Qazaqstan aýmaǵynda jumys isteýge ruqsat qaǵazy joq ekenin aitty. Bilik ókilderi Gorohovskiidiń ústinen ákimshilik hattama toltyryp, ony "Ákimshilik quqyq buzýshylyq týraly" kodekstiń 517-baby ("Sheteldiktiń nemese azamattyǵy joq adamnyń Qazaqstan Respýblikasynyń halyqtyń kóshi-qon salasyndaǵy zańnamasyn buzý") boiynsha aiyptaǵan. Bul bapta aiypty dep tanylǵan adamǵa 25 ailyq eseptik kórsetkish mólsherinde aiyppul salý ne on táýlikke merzimge ákimshilik qamaýǵa alý nemese ony Qazaqstan aýmaǵynan shyǵaryp jiberý jazalary qarastyrylǵan.
Politsiia Gorohovskiidiń migratsiialyq kartasyn qaitaryp bergen. Ol Kievke 18 qyrkúiekte qaitatynyn aitty.
