Қазақстан Тәуелсіздігіне 25 жыл

"21 jyl perzent kúttik": Ómirqul Ainiiazov jan syryn aqtardy

"21 jyl perzent kúttik": Ómirqul Ainiiazov jan syryn aqtardy
Foto-kollaj: ult.kz

Tanymal ánshi Ómirqul Ainiiazov jubaiymen 21 jyl boiy perzent kútkenin aityp, sol kezeńde basynan ótken aýyr sátterdi eske aldy. Óner iesi tipti ekinshi ret úilenýdi de oilaǵanyn moiyndady, dep habarlaidy ult.kz.

Ánshi Kezdesu Youtube-arnasyna bergen suhbatynda otbasy, mahabbat jáne bala tárbiesi týraly oiyn ortaǵa saldy. Onyń aitýynsha, erli-zaiyptylardy bir shańyraq astynda ustap turatyn basty nárse – bala emes, bir-birine degen súiispenshilik pen qurmet.

"Mahabbat – birinshi bolý kerek. Keibir adamdar "mahabbat joq, bala úshin júredi" dep jatady. Olai bolmaidy dep oilaimyn. Mahabbat bolmasa, bireýdiń qasyna jatý da ońai emes. Sondyqtan birinshi mahabbat, sodan soń syilastyq, baǵalaý", – dedi ánshi.

21 jyldyq kútý jáne ekinshi áiel alý týraly oi

Ómirqul Ainiiazov otbasymen birge uzaq jyldar boiy sábi súiýdi armandaǵanyn aitty. Perzent kútken jyldary túrli qiyndyqtarǵa tap bolyp, keide bolashaǵyna qatysty kúrdeli oilarǵa berilgen.

Ánshi bir kezderi ekinshi áiel alýdy da oilaǵan. Alaida mundai qadamǵa barýǵa júregi daýalamaǵanyn jetkizdi.

"21 jyl boiy balaly bola almai júrgen kezde adamnyń basyna neshe túrli oi keledi. Men de "múmkin basqa áiel alý kerek shyǵar" dep oiladym. Biraq jalǵyz balamnyń kózi móldirep basqa jaqta júrgenin elestete almadym. Meniń júregim ondaiǵa daýalamady", – dedi óner iesi.

Onyń sózinshe, otbasy úshin eń mańyzdysy – qiyndyqqa qaramastan, bir-birine degen senim men syilastyqty joǵaltpaý.

Eki balasy EKO arqyly dúniege kelgen

Óner iesi suhbatta balalarynyń qalai dúniege kelgenin de jasyrmady. Aitýynsha, keiingi eki perzenti ekstrakorporaldy uryqtandyrý (EKO) ádisimen týǵan. Erli-zaiyptylar 2013 jyldan bastap osy jolmen balaly bolýǵa talpynyp, kóp jyl boiy nátijesin kútken.

"Jasyrýdyń qajeti joq, keiingi eki balamyz da EKO arqyly dúniege keldi. Onyń ózi de ońai emes. Ol dúniemen 2013 jyldan bastap ainalyssaq, 2021 jyly balaly boldyq", – dedi ánshi.

Ómirqul Ainiiazov bul joldyń ońai bolmaǵanyn aityp, uzaq kútken sábileriniń dúniege kelýi otbasy úshin úlken qýanysh bolǵanyn jetkizdi.

"Elden uialyp, ýaqyt joǵaltpańyzdar"

Ánshi perzent súie almai júrgen otbasylarǵa da keńes berdi. Onyń pikirinshe, keibir erli-zaiyptylar jurttyń sózinen qysylyp, dárigerge qaralýdy keiinge qaldyrady. Sonyń saldarynan qymbat ýaqytyn joǵaltýy múmkin.

"Qazaqylyqqa salynyp, elden uialap qalmaý kerek. Kóp jas balalarmen áńgime aitqanda "ýaqyt ótkizbe, máseleni túbine deiin sheshý kerek" dep aitamyn", – dedi Ómirqul Ainiiazov.

Óner iesi EKO arqyly balaly bolýdy uiat sanamaýǵa shaqyrdy. Ol sábi súigisi keletin juptarǵa ýaqyt ozdyrmai, mamandardan kómek suraýdyń mańyzdy ekenin aitty.