Elimizdegi aq maqtany ósiretin jalǵyz óńir bolyp tabylatyn Ońtústik Qazaqstan oblysynda maqta terimi bastaldy, dep habarlaidy "Ult aqparat" ákimniń baspasóz qyzmetine silteme jasap.
Qazirgi tańda aq altyndy jinaýdy Maqtaral aýdanyndaǵy Atamaken, Sh.Dildábekov, Maqtaly, Qyzylqum, Jambyl jáne Qaraqoi aýyldaryndaǵy usaq sharýa qojalyqtary bastap ketti.
Biyl oblysta 134,6 myń gektar jerge maqta shiti sebilgen. Bul ótken jylmen salystyrǵanda 25 myń gektarǵa artyq. 2016 jyly sharýalar ár gektaryna ortasha eseppen 26,2 tsentnerden ónim alyp, barlyǵy 286,4 myń tonna aq ulpa jinaǵan. Egis kóleminiń artýyna bailanysty óńirde 300 myń tonnadan astam maqta jinalady dep josparlanýda.
Elimizdegi aq altynnyń otany sanalatyn Maqtaral aýdanynda ótken jyly 83 myń gektarǵa maqta shiti sebilse, biyl maqta alqaby 95 myń gektarǵa jetken. Aýdan sharýalary ótken jyly 218 myń tonna ónim jinasa, biyl da mol ónim alýdy kózdep otyr.
Oblys boiynsha maqta daqyly 9 aýdanda egiledi. Alǵash bolyp jiyn-terim jumystary Maqtaral, Sharadara, Saryǵash aýdandarynda basatalady. Eń sońǵy bolyp aq altyndy Túrkistandyq sharýalar jinaidy.
Maqta - eksporttyq áleýeti joǵary daqyldardyń biri. Elimiz aq altyndy negizinen Resei, Qytai jáne Evropa elderine eksporttaidy. Máselen ótken jyly atalǵan memleketterge elimizden 58 myń tonna maqta talshyǵy eksporttalǵan.
