«Qazaqstan KVN Odaǵynyń» prezidenti Esen Eleýken Ońtústik Qazaqstan oblysynyń jastarymen kezdesti. Oblystyq «Jastar resýrstyq ortalyǵynda» ótken basqosýǵa óńirdiń 14 aýdan, qalalarynan 100-den astam jastar qatysty, dep habarlaidy QazAqparat tilshisi.
Jastar úshin kópten kútken kezdesý Elbasynyń «Bolashaqqa baǵdar: rýhani jańǵyrý» baǵdarlamalyq maqalasyn jastar arasynda keńinen nasihattaý men jas urpaqtyń boiyna otansúigishtik pen jaýapkershilikti, jańashyldyqty sińdirý maqsatynda uiymdastyryldy. Jiynda «Qazaqstan KVN Odaǵynyń» prezidenti Esen Eleýken stýdentter men jas mamandardy ulttyq qundylyqty saqtaýǵa, óz eliniń patrioty bolýǵa shaqyrdy.
«Ulttyq qundylyqtardy kelesi urpaqqa jetkizý úshin biz ózimizdiń ulttyq kodymyzdy saqtaýymyz kerek. Ulttyq kodymyzdy saqtaý úshin biz ózimizdiń mádeni, tarihi qundylyqtarymyzdy damyta otyryp, álemniń jaqsy qasitetterin boiymyzǵa sińirýimiz kerek. Jaqsydan úiren, jamannan jiren. Prezidenttiń oi-pikirleri babalardyń ulaǵatymen astasyp jatyr. Atalarymyz uly dala men uly mádenietti mura etti. Ol - jalpyǵa ortaq qundylyq», - dedi «Qazaqstan KVN Odaǵynyń» prezidenti.
Óz kezeginde jastar da mańyzdy maqalany qoldaityndyqtaryn jetkizip, ondaǵy máselelerge bailanysty usynystaryn ortaǵa saldy. Kópshilik aldynda sóz sóilegender rýhani kemel el bolý - Elbasy armany, al mádeniet jańǵyryp, oi-óristi keńeitý - igi bastama degen pikirlerin bildirdi. Endeshe Elbasynyń jastarǵa serpilis berýi keleshekke qamdanýdyń áreketi dep oi túigen jastar aýyldarda atalmysh kezdesýdi jalǵastyrýǵa kelisti.
