Foto: primeminister.kz
Úkimette vitse-premer Serik Jumanǵarinniń tóraǵalyǵymen ótken keńeste jem-shóp daiyndaý naýqanynyń qorytyndysy aityldy, - dep habarlaidy "Ult aqparat" primeminister.kz saityna silteme jasap.
Óńirlerde barlyǵy 24,7 mln tonna jem-shóp daiyndalǵan. Bul maldy qystan shyǵarýǵa qajetti mal azyǵy kóleminiń 98,9%-yn quraidy. Jem-shóp qorynyń quramyna 1,5 mln tonna shóp, 1,9 mln tonna súrlem, 4,5 mln tonna saban, 4,9 mln tonna qunarly jem kiredi. Biylǵy aýa raiynyń qolaisyzdyǵyna qaramastan, mundai nátijelerge jedel shtabtyń ýaqtyly áreket etýiniń jáne memlekettik qoldaý sharalarynyń arqasynda qol jetkizilgen.
«”Azyq-túlik korporatsiiasy” AQ jelisi boiynsha fermerlerge arzandatylǵan baǵamen astyq satýǵa arnalǵan 235 myń tonna kóleminde jem-shóp qory qalyptastyryldy. Jemshóp daiyndaý úshin qosymsha 58 myń tonna jeńildetilgen dizel otyny bólindi. "QazAgroQarjy" AQ jem-shóp daiyndaý tehnikasynyń jeńildikti lizingin qarjylandyrý úshin 10 jylǵa 6%-ben 20 mlrd teńge bóldi. Bul baǵdarlama boiynsha 6,9 mlrd teńge igerildi, bul 35%-dy quraidy», — dedi aýyl sharýashylyǵy vitse-ministri Amangalii Berdalin.
«Báiterek» UBH» AQ jelisi arqyly aýyl sharýashylyǵy taýaryn óndirýshiler nesieleriniń merzimin uzartý jáne qaita qurylymdaý jumystary júrgizilip keledi. Qazirdiń ózinde 23,5 mlrd teńgege 574 ótinim maquldandy, 16 mlrd teńgeniń 224 ótinimi qaralyp jatyr. Sonymen qatar Mańǵystaý oblysynyń malshylary úshin temirjol kóligimen mal azyǵyn tasymaldaý tarifteri 80%-ǵa tómendetildi.
«13 óńirde mal azyǵyn sýbsidiialaý úshin taýar óndirýshilerge barlyǵy 27,6 mlrd teńge baǵyttaldy, onyń ishinde jedel shtabtyń usynysy boiynsha 12,9 mlrd teńge qosymsha bólindi», — dep atap ótti Berdalin.
Osylaisha, qabyldanǵan sharalar qysqa qajetti mal azyǵy qorlaryn qalyptastyrýǵa múmkindik berdi. SQO, Qaraǵandy, Mańǵystaý, Pavlodar oblystarynda pishen men qunarly jemniń jetispeýshiligi baiqalady. Jiyn qorytyndysy boiynsha Serik Jumanǵarin barlyq óńirlerde qajetti mal azyǵy kólemin daiyndaýdy qamtamasyz etýdi jáne olardy mal qystaityn oryndarǵa jetkizýdi erekshe baqylaýǵa alýdy tapsyrdy.
