Abai oblysynyń Kókpekti aýdanynda bank shotyn bógde adamdardyń paidalanýyna bergen 30 jastaǵy áiel sottaldy. Ol shotyn paidalanǵany úshin 40 myń teńge syiaqy alǵan, dep habarlaidy ult.kz.
Polisia.kz málimetinshe, oqiǵa 1 naýryzda bastalǵan. Áiel Instagram jelisinen bank shotyn jalǵa berý arqyly aqsha tabýǵa bolatyndyǵy týraly habarlandyrý kórgen. Silteme arqyly Telegram-ǵa ótip, belgisiz adammen bailanysqa shyqqan.
Hat almasý barysynda oǵan ártúrli adamdardan aqsha qabyldaý úshin óziniń bank shotyn úshinshi tulǵalardyń paidalanýyna berý usynylǵan. Ol úshin syiaqy tólenetini aitylǵan.
Áiel kúmándi usynystan bas tarta alsa da, oǵan kelisip, bank shotyn bógde adamdardyń paidalanýyna bergen. 2-9 naýryz aralyǵynda shotyna ártúrli adamdardan aqsha aýdarylǵan. Al shotyn paidalanýǵa bergeni úshin ol 40 myń teńge alǵan.
Sot áieldiń áreketin bank shotyna, tólem quralyna nemese sáikestendirý quralyna qoljetimdilikti zańsyz usyný, berý jáne alý, sondai-aq tólemder men aqsha aýdarymdaryn zańsyz júzege asyrýǵa qatysty qylmystyq quqyq buzýshylyq retinde saralady.
Sot úkim shyǵarǵan kezde áieldiń kinásin tolyq moiyndaǵanyn, jasaǵan isine shyn júrekten ókingenin jáne asyraýynda kámeletke tolmaǵan balalary baryn eskerdi.
Nátijesinde oǵan aiyppul túrinde jaza taǵaiyndalyp, jábirlenýshilerge májbúrli tólem óndirildi.
Politsiia azamattardy áleýmettik jelilerdegi «ońai tabys» týraly kúmándi usynystarǵa senbeýge shaqyrdy. Bank shotyn nemese tólem quraldaryn bógde adamdarǵa syiaqy úshin berý qylmystyq jaýaptylyqqa ákelýi múmkin.
