Jangeldin aýylyndaǵy otbasynyń qazasyna qatysty sot protsesinde búgin aiyptalýshy Sultan Sársemálievtiń ata-anasy kýálik berdi, dep habarlaidy ult.kz "Aq Jaiyq" basylymyna silteme jasap.
Is boiynsha jalpy 26 kýá ótedi. Sot otyrysynda alǵash bolyp aiyptalýshynyń ákesi Samiǵolla Sársemáliev jaýap berdi. Aqsaqaldyń aqsap júrgenin baiqaǵan sýdia oǵan otyryp jaýap berýge ruqsat etti.
Jaýap alý bastalǵan sátte Sultan Sársemáliev kózine jas alyp, tolqýyn jasyra almady. Onyń advokaty sýdianyń suraǵyna qysqasha:
— Tolqyp otyr, — dep jaýap berdi.
Ákesi ulyn sabyrly, otbasyna janashyr adam retinde sipattady. Onyń aitýynsha, Sultan temeki shekpegen, nasybai qoldanbaǵan, qumar oiyn oinamaǵan jáne janjaldan aýlaq júrgen.
— Otbasyna qamqor boldy, jaýapkershiligi joǵary edi, — dedi kýáger.
Sonymen qatar ol ulyn tolyq aqtap alýǵa tyryspaitynyn aityp, sot ádil sheshim shyǵarady degen úmit bildirdi.
— Kináli kim ekenin sot anyqtap, bul iske núkte qoiady dep senemin, — dedi ol.
Ákesiniń sózinshe, ol áli kúnge deiin bolǵan jaǵdaiǵa sene almaidy. Sondai-aq nemerelerine jii baryp turatynyn aitty. Qazirgi tańda bir bala sábiler úiinde bolsa, taǵy tórteýi kámeletke tolmaǵandardy beiimdeý ortalyǵynda tárbielenip jatyr.
Sot barysynda kýáger Sultan men burynǵy jubaiy Aqbaian Muqanǵalieva arasyndaǵy qarym-qatynasqa syrt adamdar aralasqan bolýy múmkin degen pikir bildirdi. Alaida muny qylmysqa sebep retinde qarastyrýǵa bolmaitynyn aitty.
Ákesi ulynyń balalyq shaǵynda psihologiialyq jaraqattar bolmaǵanyn, sondai-aq kelinimen arasynda aýyr janjaldardy baiqamaǵanyn jetkizdi.
— Onyń Aqbaianǵa qol kótergenin de, dóreki sóilegenin de kórgen emespin, — dedi ol.
Keiin sotta aiyptalýshynyń anasy Gúlnar Azmuhanova kýálik berdi. Ol suraqtarǵa jaýap berýden bas tartqandyqtan, tergeý kezinde bergen jaýaby oqyldy. Áiel óz sózderin tolyq rastady.
Sot zalynan shyǵar aldynda anasy ulyna qarata sóz sóileýge ruqsat surap, onyń bes balasynyń bar ekenin eske saldy.
— Sen bul ómirde kóp qýanysh kórmediń. Ómir boiy kúrestiń. Myqty bol. Ómir úshin kúres. Men balalaryńa ákeleri bar ekenin aityp júremin, — dedi anasy.
Sot protsesi jalǵasyp jatyr.
Buǵan deiin Sultan Sársemáliev qandy qylmysty qalai jasaǵanyn sotta baiandaǵanyn jazǵan edik.
