جانگەلدين اۋىلىنداعى وتباسىنىڭ قازاسىنا قاتىستى سوت پروتسەسٸندە بٷگٸن ايىپتالۋشى سۇلتان سەرسەمەليەۆتٸڭ اتا-اناسى كۋەلٸك بەردٸ, دەپ حابارلايدى ult.kz "اق جايىق" باسىلىمىنا سٸلتەمە جاساپ.
ٸس بويىنشا جالپى 26 كۋە ٶتەدٸ. سوت وتىرىسىندا العاش بولىپ ايىپتالۋشىنىڭ ەكەسٸ ساميعوللا سەرسەمەليەۆ جاۋاپ بەردٸ. اقساقالدىڭ اقساپ جٷرگەنٸن بايقاعان سۋديا وعان وتىرىپ جاۋاپ بەرۋگە رۇقسات ەتتٸ.
جاۋاپ الۋ باستالعان سەتتە سۇلتان سەرسەمەليەۆ كٶزٸنە جاس الىپ, تولقۋىن جاسىرا المادى. ونىڭ ادۆوكاتى سۋديانىڭ سۇراعىنا قىسقاشا:
— تولقىپ وتىر, — دەپ جاۋاپ بەردٸ.
ەكەسٸ ۇلىن سابىرلى, وتباسىنا جاناشىر ادام رەتٸندە سيپاتتادى. ونىڭ ايتۋىنشا, سۇلتان تەمەكٸ شەكپەگەن, ناسىباي قولدانباعان, قۇمار ويىن ويناماعان جەنە جانجالدان اۋلاق جٷرگەن.
— وتباسىنا قامقور بولدى, جاۋاپكەرشٸلٸگٸ جوعارى ەدٸ, — دەدٸ كۋەگەر.
سونىمەن قاتار ول ۇلىن تولىق اقتاپ الۋعا تىرىسپايتىنىن ايتىپ, سوت ەدٸل شەشٸم شىعارادى دەگەن ٷمٸت بٸلدٸردٸ.
— كٸنەلٸ كٸم ەكەنٸن سوت انىقتاپ, بۇل ٸسكە نٷكتە قويادى دەپ سەنەمٸن, — دەدٸ ول.
ەكەسٸنٸڭ سٶزٸنشە, ول ەلٸ كٷنگە دەيٸن بولعان جاعدايعا سەنە المايدى. سونداي-اق نەمەرەلەرٸنە جيٸ بارىپ تۇراتىنىن ايتتى. قازٸرگٸ تاڭدا بٸر بالا سەبيلەر ٷيٸندە بولسا, تاعى تٶرتەۋٸ كەمەلەتكە تولماعانداردى بەيٸمدەۋ ورتالىعىندا تەربيەلەنٸپ جاتىر.
سوت بارىسىندا كۋەگەر سۇلتان مەن بۇرىنعى جۇبايى اقبايان مۇقانعاليەۆا اراسىنداعى قارىم-قاتىناسقا سىرت ادامدار ارالاسقان بولۋى مٷمكٸن دەگەن پٸكٸر بٸلدٸردٸ. الايدا مۇنى قىلمىسقا سەبەپ رەتٸندە قاراستىرۋعا بولمايتىنىن ايتتى.
ەكەسٸ ۇلىنىڭ بالالىق شاعىندا پسيحولوگييالىق جاراقاتتار بولماعانىن, سونداي-اق كەلٸنٸمەن اراسىندا اۋىر جانجالداردى بايقاماعانىن جەتكٸزدٸ.
— ونىڭ اقبايانعا قول كٶتەرگەنٸن دە, دٶرەكٸ سٶيلەگەنٸن دە كٶرگەن ەمەسپٸن, — دەدٸ ول.
كەيٸن سوتتا ايىپتالۋشىنىڭ اناسى گٷلنار ازمۇحانوۆا كۋەلٸك بەردٸ. ول سۇراقتارعا جاۋاپ بەرۋدەن باس تارتقاندىقتان, تەرگەۋ كەزٸندە بەرگەن جاۋابى وقىلدى. ەيەل ٶز سٶزدەرٸن تولىق راستادى.
سوت زالىنان شىعار الدىندا اناسى ۇلىنا قاراتا سٶز سٶيلەۋگە رۇقسات سۇراپ, ونىڭ بەس بالاسىنىڭ بار ەكەنٸن ەسكە سالدى.
— سەن بۇل ٶمٸردە كٶپ قۋانىش كٶرمەدٸڭ. ٶمٸر بويى كٷرەستٸڭ. مىقتى بول. ٶمٸر ٷشٸن كٷرەس. مەن بالالارىڭا ەكەلەرٸ بار ەكەنٸن ايتىپ جٷرەمٸن, — دەدٸ اناسى.
سوت پروتسەسٸ جالعاسىپ جاتىر.
بۇعان دەيٸن سۇلتان سەرسەمەليەۆ قاندى قىلمىستى قالاي جاساعانىن سوتتا بايانداعانىن جازعان ەدٸك.
