Oljas Súleimenovtiń nemeresi Eskendir Súleimenovtiń jol apatynan kóz jumý jaǵdaiy boiynsha jábirlenýshi taraptyń sot otyrysyn shegerý týraly ótinishi maquldandy, dep habarlaidy QazAqparat tilshisi.
Aita ketsek, Astana qalasynyń Esil aýdandyq №2 sotynda Oljas Súleimenovtiń 26 jastaǵy nemeresi Eskendir Súleimenovtiń jol apatynan kóz jumý jaǵdaiy boiynsha sot protsesi búgin bastalǵan bolatyn.
Jábirlenýshi tarap kýágerlerdiń bári sotqa kele almaǵandyqtan, sot otyrysyn keiinge shegerýdi surady.
«Sot jábirlenýshi tarapynyń ókili Sandinov Damir Nurahmetulynyń ótinishin maquldai otyryp, qylmystyq isti qaraýdy 17 qazan kúni saǵat 15:00-ge aýystyrady», - dedi sýdia Qanat Tobaǵaliuly.
Eske sala ketsek, osy jyldyń maýsymynda Astanadaǵy jan túrshigerlik jol apatynda Oljas Súleimenovtiń 26 jastaǵy nemeresi Eskendir Súleimenov mert bolǵan edi. Apat 22 maýsym kúni Astanadaǵy «Máńgilik el» dańǵyly men «Kerei men Jánibek handar» kóshesiniń qiylysynda bolǵan. Mototsikl tizgindegen Eskendirdi belgisiz kólik qaqqan jáne ol oqiǵa ornynan qashyp ketken.
Arada kóp ótpei Astana qalalyq ishki ister departamenti apatqa sebepker bolýy múmkin «Hyundai» avtokóliginiń iesi, 29 jastaǵy astanalyq áielge qatysty tergeý amaldary júrip jatqanyn habarlaǵan edi.
Sondai-aq Astana qalasynyń Ishki ister departamenti Oljas Súleimenovtiń nemeresi - Eskendir Súleimenovti kóligimen qaǵyp óltirgen júrgizýshi Qyzylorda oblystyq Ishki ister departamenti bastyǵynyń qyzy ekenin rastaǵan.
