Astanada jol apatynan mert bolǵan aqyn Oljas Súleimenovtiń nemeresi - Eskendir Súleimenovtiń ólimine qatysty búgingi sot protsesi aiaqtaldy. Sot otyrysynda marqumnyń dosy Qýanysh Turataev dosy Eskendirdiń qandai adam bolǵanyn aityp berdi, dep habarlaidy QazAqparat tilshisi.
«Men - Eskendirdiń dosy ári áriptesimin. Biz ulttyq kompaniiada bir jyldai birge jumys istedik. Meniń áielim men Eskendir Frantsiiada birge oqyǵan. Meniń zaiybym ony óziniń baýyry dep esepteitin. Ol bizdiń otbasy úshin óte jaqyn adam edi. Bir-birimizdi buryn syrttai bilgenimizben, keiin Almatyda tanystyq. Eskendir senimdi dos ári áriptes edi. Qiyn sátterde senýge bolatyn naǵyz azamat bolatyn. Jaqyndary men týystarynyń qýanyshyna shyn júregimen qýana biletin. Ol shynaiy adam edi. Kókjiegi keń bolatyn. Ónerdi jaqsy túisindi, poeziiany súidi. Óleń jazyp júrdi. Italian jáne aǵylshyn tilin jetik bildi», - deidi Eskendirdiń dosy.
Onyń aitýynsha, Eskendirdiń árbir jaǵdaiǵa qatysty ózindik pikiri bolatyn.
«Ol óte ashyq adam edi. Súiiktisin, týystaryn, dostaryn jaqsy kórdi. Biz únemi birge tústenetinbiz. Sondai túski astardyń birinde úilený týraly usynysty qalai jasaýǵa bolatyny jóninde aqyldasqanymyz bar. Onyń áriptesi retinde aitarym - ol bizdiń kompaniianyń jaýapty departamentteriniń birinde eńbek etti. Jaýapkershiligi mol maman, salmaqty sarapshy boldy. Ujym ony baisaldy ári jaýapty maman retinde biledi. Onymen kez kelgen ýaqytta aqyldasyp, mańyzdy suraqtardyń jaýabyn tabýǵa bolatyn edi. Eskendirdiń diplomatiialyq qasietin bilgen basshylyq ony iskerlik kelissózderge jumyldyryp ta júrdi. Qysqasy, ony ujymda bári baǵalaityn, jaqsy kóretin», - dedi Qýanysh Turataev.
Dosynyń aitýynsha, Eskendir shetelden oqyp kelgennen keiin óz Otanynyń damýyna úles qosýdy maqsat tutqan.
Eske sala ketsek, osy jyldyń maýsymynda Astanadaǵy jol apatynda Oljas Súleimenovtiń 26 jastaǵy nemeresi Eskendir Súleimenov mert bolǵan edi. Eskendir tizgindegen mototsikl qiylysqa shyqqan kólikke soǵyldy.
Arada kóp ótpei Astana qalalyq Ishki ister departamenti apatqa sebepker bolýy múmkin Hyundai avtokóliginiń iesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Sondai-aq, qalalyq politsiia departamenti Eskendir Súleimenovtiń mototsikly soǵylǵan júrgizýshi Qyzylorda oblystyq Ishki ister departamenti bastyǵynyń qyzy ekenin rastaǵan.
Aita ketsek, 12 qazanda Oljas Súleimenovtiń nemeresiniń ólimine qatysty sot protsesi bastalyp, Eskendir Súleimenov qaza tapqan jol apaty boiynsha sottalýshy Malika Muhitova marqumnyń ata-anasynan keshirim suraǵan edi.
