Foto: primeminister.kz
Premer-Ministr Oljas Bektenov Atyraý oblysyna jumys sapary aiasynda Jylyoi aýdanynyń Qulsary qalasynda sý tasqyny saldaryn joiý barysy jáne qalpyna keltirý jumystarynyń qarqyny týraly baiandamany tyńdady.
Atyraý oblysy boiynsha barlyǵy 1,3 mlrd teńgege 3652 otbasy 100 AEK mólsherinde birjolǵy kómek aldy.
Óńirde sý tasqynynan barlyǵy 2650 úi zardap shekti. 1 457 úi apatty dep tanyldy, 1 193 úi – kúrdeli jóndeýge jatqyzyldy.
Úkimet basshysyna Qulsary qalasynyń «Bolashaq» jańa shaǵyn aýdanynda 100 turǵyn úi salý barysy týraly baiandaldy. Búgingi tańda jumys 72%-ǵa aiaqtaldy: salynyp jatqan 96 nysannyń irgetasy qalandy, 78 úidiń qabyrǵasy turǵyzyldy, 34-inde tóbesin jabý jumystary bastaldy. Úilerdi osy jyldyń qyrkúiek aiynyń sońyna deiin paidalanýǵa berý josparlanýda. Shaǵyn aýdandaǵy turǵyn úilerden bólek, 2 myń oryndy Binom mektebi men 300 oryndy balabaqsha salynady. Sondai-aq jańa úilerdiń bolashaq turǵyndarynyń demalýyna arnalǵan oryndar jabdyqtalady.
Úkimet basshysynyń tapsyrmasy boiynsha turǵyn úi qurylysynyń merziminde aiaqtalýyn qamtamasyz etý úshin Qulsary qalasy nysandaryndaǵy merdiger uiymdar sany 2,5 esege ulǵaityldy. Júrgizilip jatqan jumystyń sapasyn baqylaý maqsatynda ýchaskelerde Gov.kz saitynda kórsetiletin beinebaqylaý kameralary ornatylǵan.
"Sý tasqyny saldaryn joiý jáne barlyq zardap shekkenderdiń baspana máselesin sheshý Memleket basshysynyń erekshe baqylaýynda. Jumysty tezdetip, múmkindiginshe qysqa merzimde aiaqtaý kerek. Qurylystyń barlyq kezeńin baqylai otyryp, ár merdigermen jobalyq negizde jumys isteý qajet. Bul turǵyn úidiń tiisti sapasyn qamtamasyz etý úshin mańyzdy", — dep Oljas Bektenov, ákimdikke qurylys barysynda injenerlik kommýnikatsiialar júrgizý máselesin de sheshýdi eskertti.
Sonymen qatar Qulsaryda sý tasqyny kezinde búlingen avtojoldardy qalpyna keltirý jumystary júrgizilip jatyr. Búgingi tańda josparlanǵan 12,1 shaqyrymnyń 4,9 shaqyrymy jóndeldi. Sondai-aq sý tasqyny kezinde zardap shekken 215 biznes sýbektisine ótemaqy tólendi. 1614 sharýa qojalyǵyna mal men úi qustaryna keltirilgen shyǵyn óteldi.
Óz kezeginde, Úkimet basshysyna oqý-aǵartý birinshi vitse-ministri Natalia Jumadildaeva sý tasqynynan zardap shekken eldi mekender balalarynyń jazǵy demalysyn uiymdastyrý jónindegi tapsyrmanyń oryndalý barysy týraly baiandady. Búgingi tańda qaiyrymdylyq uiymdarymen birlese otyryp, 2 738 oqýshy jazǵy demalyspen qamtylǵan. Balalar oqý-saýyqtyrý ortalyqtary men lagerlerge jiberilide, sondai-aq «Týǵan elge saiahat» jobasy aiasynda elimizdiń mádeni-tarihi oryndaryna saiahattaýda.
Premer-Ministr múddeli ministrlikter men óńir ákimdigine densaýlyq saqtaý jáne bilim berý áleýmettik nysandary – mektepter, kolledjder, balabaqshalar jáne basqa da nysandar salý jáne qalpyna keltirý jumystaryn erekshe baqylaýda ustaýdy tapsyrdy.
