Foto:primeminister.kz
Qazaqstan Premer-Ministri Oljas Bektenov Batys Qazaqstan oblysynda sý tasqyny saldarynan zardap shekken, shalǵaida ornalasqan Qaratóbe aýdany Qorjyn aýylyna bardy.
Munda qiraǵan úilerdiń ornyna bir páterli 90 turǵyn úi salynyp jatyr. Irgetas qurylysy boiynsha jumys tolyǵymen aiaqtalǵan. Búgingi tańda 34 úidiń qabyrǵasy turǵyzylyp, 56 úidiń tóbesi jabylyp jatyr. Nysandardyń jalpy daiyndyǵy 50%-ǵa jetedi.
Buǵan deiin Premer-Ministrdiń tapsyrmasy boiynsha ýchaskede jumys isteitinderdiń sany 30%-ǵa artqan bolatyn. Qazirgi ýaqytta nysandarda 288 adam jumys isteidi. Jumys kestege sáikes júrgizilýde.
Oljas Bektenov salynyp jatqan qurylystardyń sapasyna erekshe nazar aýdardy.
Qorjyn aýylynda 6 merdiger uiym jumys isteidi. Qurylys-montajdaý jáne jóndeý-qalpyna keltirý jumystaryn júrgizý kezinde bekitilgen qurylys normalarynyń talaptary buzylǵan jaǵdaida qurylys kompaniialary jaýapkershilikke tartylatyny atap ótildi.
Jobaǵa sáikes úilerde qalyńdyǵy 400 mm taspaly irgetas qarastyrylǵan, irgetastyń túbinen biiktigi 1500 mm bolady. Qabyrǵalardy turǵyzýǵa qaptalǵan silikatty qyzyl kirpish, keramzitti blok, mineralmaqta plitasy qoldanylýda. Sondai-aq jobada injenerlik jelilerdi júrgizý kózdelgen.
Premer-Ministr qurylys-jóndeý jumysy barysynda otandyq óndiris materialdaryn paidalanýdyń mańyzyn atap ótti.
Áleýmettik infraqurylymǵa kelsek: aýylda qazirgi ýaqytta jóndeý jumystary júrgizilip jatqan 400 orynǵa arnalǵan mektep bar. Sonymen qatar jańa úilerdiń bolashaq turǵyndary úshin balalar alańy salynady.
«Jumysta kemshilikter bolmaýy kerek. Memleket basshysy úilerdiń tiisti sapasyn qamtamasyz etýdi tapsyrdy. Turǵyn úilerdi barlyq injenerlik jelilerge birden qosý qajet. Bul rette jol infraqurylymy men áleýmettik nysandardy tezirek qalpyna keltirýdi qamtamasyz etý mańyzdy. Aýrýhanalar, mektepter men balabaqshalar sapa men tehnikalyq jaraqtandyrýdyń zamanaýi talaptaryn eskere otyryp salynýy kerek», — dep atap ótti Oljas Bektenov.
Jaýapty ministrlikter men ákimdikke birqatar tapsyrma berildi.
Anyqtama: Batys Qazaqstan oblysynda 775 úidiń qurylysy bastaldy, 2 248-i qaitalama naryqtan satyp alynady, 1 383 nysan jóndeledi. Úiler men saiajailardy jóndeý jumystary 82,3%-ǵa aiaqtaldy. Úi salý úshin 59 merdiger uiym anyqtaldy. Oral qalasynda 374 nysan jáne aýyldyq jerlerde taǵy 401 úi salynyp jatyr. Jalpy daiyndyq 66% quraidy.
Sý tasqynynan 12 áleýmettik mekeme, 53 kólik infraqurylymy obektisi, 43 gidrotehnikalyq qurylym zardap shekti — barlyǵy boiynsha tiisti jumystar júrgizilýde. Óńirlik komissiia sý tasqynynan zardap shekkenderge tólemder berý jumysyn aiaqtady. Máselen, 9 994 otbasy 100 AEK kóleminde ótemaqy aldy (3,7 mlrd teńge), 10 222 ótinish berýshige 150 AEK-ke deiin (3,7 mlrd teńge) berildi, sýǵa ketken mal úshin 151 mln teńge deiin tólendi. Bizneske keltirilgen zalaldy óteý jumystary 35%-ǵa oryndaldy.
Foto:primeminister.kz
Foto:primeminister.kz
