Úkimet otyrysynda Premer-ministr Oljas Bektenov qazaqstandyq óndiristiń taýarlaryn ornalastyrýǵa saýda jelileriniń tásilderin qaita qaraý qajettigin jáne otandyq taýarlardyń zalalyna importtyq ónimniń artyqshylyqtaryn berýge jol bermeý qajettigin atap ótti, dep habarlaidy ult.kz.
«Halyq tutynatyn taýarlardy shyǵaratyn otandyq óndirýshiler kóp jaǵdaida saýda alańdaryna qol jetkize almaidy, onyń ishinde jaldaý aqysynyń joǵary bolýyna bailanysty qiyndyqtar da bar. Bul ishki naryqta qazaqstandyq ónimniń úlesin keńeitýge kedergi keltirip, onyń básekege qabilettiligin tómendetedi.
Saýda jelileriniń ieleri qazaqstandyq taýarlarǵa degen kózqarasyn túbegeili ózgertýge tiis dep sanaimyn. Otandyq ónimnen buryn importtyq taýarlarǵa basymdyq berý quqyqtyq jaǵynan ǵana emes, moraldyq turǵydan da durys emes», — dep atap ótti Oljas Bektenov.
Saýda ministrligine múddeli memlekettik organdarmen, óńir ákimdikterimen jáne «Atameken» palatasymen birlesip, taýarlardyń barlyq sanattaryn, onyń ishinde jeńil ónerkásip pen turmystyq himiia ónimderin shyǵaratyn otandyq óndirýshilerge saýda alańdaryn jalǵa alýdyń qolaily sharttaryn usynýdyń naqty tetikterin ázirleý tapsyryldy.
Oqi otyryńyz: Ishki naryqtaǵy otandyq ónimniń úlesi artyp keledi: birinshi jartyjyldyqta azyq-túlik óndirisiniń kólemi shamamen 10%-ǵa ósti
Sonymen qatar Premer-ministr qazaqstandyq óndirýshilerdi negizsiz aqparattyq shabýyldardan qorǵaý qajettigin atap ótti.
«Qazaqstanda óndiriletin tanymal taýarlardy, atap aitqanda, azyq-túlik jáne konditerlik ónimderdi qaralaý úshin ádeii uiymdastyrylǵan aqparattyq naýqandar oryn alýda. Munyń barlyǵynyń kózdegen maqsaty bir – básekelesterdi naryqtan yǵystyryp, olardyń ornyn iemdenip qalý. Mádeniet jáne aqparat ministrligi múddeli memlekettik organdarmen birlesip, “Qazaqstanda jasalǵan” ulttyq brendin ilgeriletýge, otandyq taýarlardy keńinen dáripteýge jáne olardy negizsiz aqparattyq shabýyldardan qorǵaýǵa baǵyttalǵan biryńǵai aqparattyq naýqannyń júrgizilýin qamtamasyz etsin», — dep atap ótti Premer-ministr.
