Jetisý oblysynyń Aqsý aýdanyna qarasty Qyzylaǵash aýylynda jurttyń jaǵasyn ustatqan oqiǵa boldy. Belgisiz bireý siyrdyń ústine eden boiaýyn quiyp, janýardyń búiirine «Óltiremin» degen jazý jazǵan, dep habarlaidy ult.kz.
Siyr iesi Serik Sapirovtyń aitýynsha, mundai áreketke áldekim maldyń ózgeniń baqshasyna kirip ketkenine ashýlanyp barǵan bolýy múmkin. Onyń sózinshe, boiaý siyrdyń kózine deiin tiip, janýarǵa ziian keltirgen.
«Eger meniń siyrym bireýdiń aýlasyna kirip, shóbin jep qoisa, aýyldastardan keshirim suraimyn. Biraq bul janýardy qorlap, azaptaýǵa sebep bolmaýy kerek. Máseleni adamsha sóilesip te sheshýge bolatyn edi», – deidi ol.
Oqiǵadan keiin mal iesi Aqsý aýdandyq politsiiasyna aryz jazyp, kinálilerdi anyqtaýdy talap etken.
Bul jaǵdai áleýmettik jelilerde de qyzý talqylanyp, jergilikti turǵyndardyń narazylyǵyn týdyrdy. Aýyl halqy janýarǵa qatygezdik tanytqandar jaýapqa tartylýy tiis dep esepteidi.
