Italiianyń Triest qalasynda sý dobynan Tokio Olimpiadasyna irikteý týrnirinde Qazaqstan áielder quramasynyń shirek finaldaǵy qarsylasy anyqtaldy, dep habarlaidy "Ult aqparat".
Esterińizge sala ketelik, Qazaqstan qyzdary V tobynda synǵa tústi. Alǵashqy oiynda Grekiiadan 5:13 , odan keiin Vengriiadan 6:23 esebimen jeńildi.
Sońǵy oiynda Izrailmen 7:7 esebimen teń túsip, óz tobynda úshinshi orynǵa jaiǵasty. Bul topta Grekiia birinshi, Vengriia ekinshi oryn aldy. Sońǵy oryndy Izrail mise tutty.
A tobynda alǵashqy eki oryndy bes upaidan jinaǵan Italiia men Niderlandy ózara bólisti. Úshinshi oryndaǵy Frantsiia 2 upai alsa, Slovakiianyń qorjyny bos.
Endi Qazaqstan qyzdary shirek finalda Niderlandymen kezdesedi. Sondai-aq, jarystyń atalǵan satysynda Slovakiia men Grekiia, Frantsiia men Vengriia, Italiia men Izrail quramalary sheberlik baiqasady. Oiyndar búgin ótkiziledi. Irikteý týrniri 24 qańtarda máresine jetedi. Olimpiadaǵa eki joldama beriledi.
Esterińizge sala ketelik, Qazaqstan quramasy Olimpiadada eki márte baq synady. 2000 jyly - 6, 2004 jyly - 8 oryn aldy.
