Bas prokýratýranyń arnaiy prokýrorlar qyzmetiniń burynǵy basshysy Olesia Kekselge qatysty sotqa deiingi tergeý toqtatyldy. Bul týraly ishki ister ministri Erlan Turǵymbaev aitty, dep habarlaidy "Ult aqparat".
«Qylmystyq quramnyń bolmaýyna bailanysty QR Bas prokýratýrasy Arnaiy prokýrorlar qyzmetiniń burynǵy basshysy Olesia Kekselge qatysty sotqa deiingi tergeý amaldary toqtatyldy. Onyń isine qatysty barlyq tergeý áreketteri júrgizilip, istiń zańdylyǵyn tekserý úshin materialdar prokýratýraǵa jóneltildi», - dedi ministr Úkimet otyrysynan keiin tilshilerdiń suraǵyna jaýap bere otyryp.
Buǵan deiin tanymal tergeýshiniń ústinen azaptaý týraly aryz túskeni habarlanǵan bolatyn.
Olesia Keksel sybailas jemqorlyqqa qatysty atyshýly isterdi tergeýmen ainalysqan.
Atap aitsaq, burynǵy premer-ministr Serik Ahmetovtyń, eks-densaýlyq saqtaý ministri Jaqsylyq Dosqalievtiń jáne burynǵy ulttyq ekonomika ministri Qýandyq Bishimbaevtyń isin tergedi.
Sybailas jemqorlyqqa qarsy is-qimyl ulttyq biýrosy (sybailas jemqorlyqqa qarsy qyzmet) tergeý departamenti bastyǵynyń orynbasary qyzmetin atqardy. 2018 jyldyń qańtar aiynan bastap bas prokýratýranyń arnaiy prokýrorlar qyzmetin basqardy. 2019 jyldyń mamyrynda qyzmetinen bosatyldy.
Kúrdeli sybailas jemqorlyq isterin tergegeni úshin 2017 jyly II dárejeli "Aibyn" ordenimen marapattalyp, bedeldi "Altyn Adam" júldesiniń "Jyldyń memlekettik qyzmetshisi" dep tanyldy.
