Búgin Úkimet otyrysynan keiin QR Ishki ister ministri Qalmuhanbet Qasymov jýrnalisterge kóktemgi sý tasqyny kezinde bolǵan qaiǵyly oqiǵaǵa túsinikteme berdi, dep habarlaidy Baq.kz tilshisi.
«Kóktemgi sý tasqyny kezinde respýblika boiynsha adam ólimi tirkelgen joq. Tiisti jumystardyń júrgizilýi qaiǵyly oqiǵalardyń aldyn alýǵa septigin tigizdi. 4 oblysta 1936 úi sý astynda qaldy», - dedi ol.
Alaida osy mezette ministrdiń sózin jýrnalist bóldi. Ol «Al keshe sý tasqynynan Aqmola oblysynda bir áiel qaitys boldy ǵoi. Osy derek she?», - dedi Qasymovqa.
«Tiisti saraptamalyq tekserister júrgizildi. Ol áielde júrek aýrýy bolǵan. Sý basqan aýmaqqa qutqarýshylar kelgen kezde áieldiń 2 táýlik buryn qaitys bolǵandyǵy anyqtaldy», - dedi ministr.
Esterińizde sala keteiik, keshe BAQ-ta Aqmola oblysynda sý basqan úilerdiń birinen áiel adamnyń óli denesi tabylǵandyǵy jóninde aqparat taraǵan bolatyn.
