Úshinshi synyp oqýshysyn zorlap, onyń anasyn óltirgen qylmyskerdiń isine qatysty sot protsesi aiaqtaldy, dep habarlady Sputnik Qazaqstan tilshisi.
Esterińizge sala keteiik, 4 shildede Qyzylorda qalasyna qarasty "Iagodka" baq sharýashylyǵy birlestigi aýmaǵynda úshinshi synyp oqýshysy zorlanǵan bolatyn, al balasyn qorǵamaq bolǵan ana qaskúnemniń qolynan qaza tapty. Otaǵasy bul ýaqytta úide bolmaǵan, Astanaǵa jumys isteýge ketken.
Politsiia bul qylmystarǵa kúdiktini izin sýytpai ustady. Tergeýdiń málimetinshe, orta jastaǵy er adam buryn baq sharýashylyǵy birlestiginde turǵan, al sol kúni munda balyq aýlaýǵa kelipti. Ol ishimdik iship alyp, ana men qyz turatyn úige kirip kelgen. Qyzdy zorlap, arasha túsken anasyn shalbardyń belbeýimen býyndyryp óltiredi. Áieldiń jan aiqaiyn estigen kórshiler politsiia shaqyrǵan. Jaraqat alǵan qyz aýrýhanaǵa jatqyzyldy, áieldi birneshe kúnnen keiin týystary men saiajai turǵyndary jer qoinyna tapsyrdy.
Bul eki qylmys týraly is tergelip, Qyzylorda oblysy qylmystyq ister jónindegi mamandandyrylǵan aýdanaralyq sotyna berildi. Sottalýshy QR Qylmystyq kodeksiniń birneshe baby boiynsha kináli dep tanyldy.
Sondai-aq sotta qylmyskerdiń aqyl-esi kem bolǵandyqtan túrmede otyrmaityny habarlandy.
"Qylmystyq áreketterdi qabiletsiz halde jasaýyna bailanysty, ambýlatorlyq sot-psihiatriialyq saraptamanyń qorytyndysy negizinde oǵan meditsinalyq sipattaǵy májbúrleý sharalary qoldanyldy, ol psihiatriialyq statsionarda emdeledi", — dep jazylǵan habarlamada.
Buǵan deiin qyzdyń ákesi turaqty baspanasy men tabysy bolmaǵandyqtan balasyn úiine ákete almai júrgeni habarlanǵan edi. Qyz kámeletke tolmaǵandardy beiimdeý ortalyǵynda turyp jatyr.
