Aqtóbe oblysynda 9-synyp oqýshysy oqý jylynyń alǵashqy kúninde kóz jumdy. Aýyl mektebiniń 18 oqýshysynan jaýap alynyp, 2 adam kúdikti retinde qamaldy.
Politsiia departamentiniń dereginshe, jasóspirimder arasyndaǵy tóbeles 2 qyrkúiek kúni túnde Aqtóbe oblysy Temir aýdany Qopa aýylynda tirkeldi.
Tóbelesten keiin jan tapsyrǵan oqýshy qazan aiynda 15 jasqa tolýy kerek edi. Marqumnyń týystary ázirge eshqandai pikir bildire almaitynyn, tergeý amaldarynyń nátijesin kútetinin aitty. Temir aýdany ákimdiginiń aitýynsha, janjaldyń neden shyqqany ázirge belgisiz. Oqiǵadan keiin 18 balanyń aýdandyq politsiia bólimine jetkizilgeni belgili boldy.
"Jasóspirimder arasynda bir-birimen kelispeýshilik boldy. Mán-jai tergeý kezinde anyqtalady. Keshe ata-analarymen birge 18 balany mektep avtobýsymen aýdandyq politsiia bólimshesine alyp keldik. Qazir árqaisysynan jaýap alyp jatyr. Qalai bolǵany ázirge belgisiz. Ol jerdiń balalarynyń bári tatý, aldyńǵy qatardaǵy aýyl edi. Balalardyń bári sportqa jaqyn, voleibol, fýtbol, tennis oiyndaryna belsene qatysatyn", – dedi Temir aýdany ákiminiń orynbasary Qairat Nuraly.
Aqtóbe oblystyq bilim basqarmasy oqys oqiǵadan keiin zerdeleý jumystarynyń kúsheigenin habarlaidy.
"Temir aýdany, Qopa aýylynda kámeletke tolmaǵan oqýshylar arasynda tóbeles bolyp, 9-synyp oqýshysy oqiǵa ornynda kóz jumdy. Oqys oqiǵa boiynsha Qopa aýylyna bilim basqarmasy basshysynyń orynbasary jetekshiligimen jumys toby jetip, zerdeleý jumysyn júrgizip jatyr. Jumys tobynyń quramynda Aqtóbe oblysy boiynsha bala quqyqtary jónindegi ýákil de bar. Sondai-aq atalǵan máselege qatysty qylmystyq is qozǵalyp, tergeý amaldary bastaldy", – dep habarlaidy bilim basqarmasy.
Aqtóbe oblystyq PD oqiǵadan keiin qylmystyq istiń qozǵalǵanyn jáne eki kúdiktiniń qamaýǵa alynǵanyn jetkizdi.
"Kámeletke tolmaǵan balanyń qaitys bolý faktisi boiynsha Temir aýdany politsiia bólimimen qylmystyq is qozǵaldy. Janjaldyń barlyq qatysýshylary anyqtalyp, politsiiaǵa jetkizildi. Eki kúdikti ústaldy. Tergeý áreketteri júrgizildi. Ózge de aqparat tergeý múddesi úshin jariialanbaidy", – dedi oblystyq politsiia departamentiniń baspasóz qyzmeti.
