Qarjylyq monitoring agenttiginiń Almaty oblysy boiynsha departamenti lombard qyzmetin júrgizý quqyǵynan aiyrylǵanyna qaramastan, jumysyn jalǵastyrǵan «Albi» jelisiniń zańsyz áreketin toqtatty. Tergeý dereginshe, kúdiktilerdiń zańsyz qyzmetten tapqan tabysy 146 mln teńgeden asqan, dep habarlaidy ult.kz.
Qarjylyq monitoring agenttiginiń málimetinshe, sot sanktsiiasymen kúdiktige tiesili 21 páterge, 5 jer ýchaskesine, 7 avtokólikke, 7 garajǵa, 2 dúken men qonaqúige tyiym salynǵan.
Tergeý materialdaryna sáikes, buǵan deiin «Albi-Lombard» JShS mikroqarjylyq qyzmet kórsetetin uiymdardyń tiziliminen shyǵarylyp, lombard qyzmetin júrgizý quqyǵynan aiyrylǵan. Alaida kompaniia ataýyn «Albi-KM» JShS dep ózgertkennen keiin de Almaty jáne Túrkistan oblystarynda zergerlik buiymdardy kepilge alyp, halyqqa qaryz berýdi jalǵastyrǵan.
Lombard bólimsheleri negizinen bazarlar men saýda úileriniń mańynda ornalasqan. Klient tartý úshin kepilge qoiylǵan múlikti joǵary baǵalaitynyn jáne qaryz alýdyń nesie tarihyna áser etpeitinin alǵa tartyp, jarnama taratqan.
Al qaryz alýshylarǵa kúnine 2 paiyzdyq ósimmen aqsha berilgen. Bul zańda belgilengen 0,3 paiyzdyq shekti mólsherlemeden shamamen 6,7 ese joǵary. Qaryz sharttary burynǵy «Albi-Lombard» JShS-niń móri basylǵan kepil biletteri arqyly rásimdelgen. Aqshalai esep aiyrysý qolma-qol jáne kúdiktilerdiń baqylaýyndaǵy jeke kásipkerlerdiń bank shottary arqyly júrgizilgen.
Kúdikti áielge qatysty eshqaida ketpeý jáne tiisti minez-qulyq týraly qolhat túrindegi bultartpaý sharasy qoldanylǵan.
Qylmystyq is sotqa joldandy. Istiń ózge derekteri Qylmystyq-protsestik kodekstiń 201-babyna sáikes jariia etilmeidi.
Buǵan deiin Astanada zańsyz oiyn biznesin uiymdastyrýshylardan 124,8 mln teńgeden astam qarjy óndirilgeni týraly jazǵan edik.
