Ońtústik Qazaqstan oblysy Tólebi aýdanyndaǵy bilim uialarynyń materialdyq-tehnikalyq bazasy jyldan-jylǵa jaqsaryp keledi. Biyl oblystyq biýdjet esebinen Alǵabas, Birinshi Mamyr, Ál-Farabi jalpy orta mektepterinde oqý blogy, ashana, eńbek sheberhanasy, sport, akt zal, kitaphana qurylystaryna qarjy bólingen. Sondai-aq jańa oqý jylynda alǵabas orta mektebiniń qurylysy aiaqtalyp, el igiligine berildi. Aldaǵy jyly aýdanda Birinshi mamyr, Ál-Farabi jalpy orta mektepteriniń qurylysyn aiaqtap, paidalanýǵa tapsyrý kózdelip otyr, dep jazady "Ult aqparat" ákimniń baspasóz qyzmetine silteme jasap.
Aita keteiik, jalpy Tólebi aýdanynda 67 mektep bar. Onyń 52-si orta, 6-ýy negizgi, 9-y bastaýysh mektep, 5-ýi mektepten tys mekeme sanalsa, 28-i memlekettik balabaqsha, 19-y jekemenshik balabaqsha, sondai-aq 21 shaǵyn ortalyq pen 2 keshki mektep jumys isteidi.
«Oblys ákimi Janseiit Túimebaevtyń tapsyrmasymen biyl aýdanynmyzdaǵy 4 mektepte aǵymdaǵy jóndeý jumystary júrgizildi. Atap aitsaq, Shomshaqty orta mektebiniń sport zalynyń tóbesin jabý, №3 orta mektebindegi gaz qazandyǵyn aýystyrý, №2 orta mektep aýlasyna asfalt tóseý, Mádeni orta mektebiniń syrtyn sylaý jumystary aiaqtaldy. Budan bólek, 67 mekteptiń oqý ǵimarattary áktelip, boialyp, oqý jabdyqtary jóndeýden ótti», - deidi aýdan ákiminiń orynbasary Ǵalymjan Tólepov.
Biyl sondai-aq aýdandaǵy 44 mektepke 5133 dana parta oryndyǵymen jáne 144 dana taqta alýǵa aýdandyq biýdjetten qarjy bólinipti. Aýdandaǵy 67 mekteptiń 66-sy avtonomdy jylytý júiesimen, al Taǵaina orta mektebi peshpen jylytylady. 37 mektep kómir, 31-i suiyq otyn paidalanady. Qajetti kómir mektepterge tasylyp, arnaýly qoimalarda saqtaýly tur.
Oblys ákiminiń mektepterdegi jylytý júiesin syǵymdaýdan ótkizý tapsyrmasy da oidaǵydai oryndalǵan. Aitalyq, 67 mekteptiń jylytý júiesi syǵymdaýdan ótkizilipti.
