Ońtústik Qazaqstan oblysyndaǵy diqandar qaýyn-qarbyz ósirýdi sheber meńgerip, baqsha daqyldarynyń eksportqa jaramdy neshe túrli sorttaryn shyǵarýda. Biylǵy jyly oblys boiynsha 57 myń gektar jerge qaýyn-qarbyz egilse, olardan 224 myń tonna ónim jinalyp otyr. Jinalǵan ónimniń ishinde 166 myń tonnasy qarbyz, 58 myń tonnasy qaýyn. Bul týraly OQO ákiminiń baspasóz qyzmeti habarlady.
Agrarly aimaq diqandary qazirgi tańda jinalǵan baqsha daqyldaryn jergilikti saýda oryndarynan bólek, elimizdiń ózge aimaqtary men shet elderine eksportqa shyǵarýda. Máselen, Reseige 35 myń tonna qarbyz, 16 myń tonna qaýyn, al Belarýs eline 481 tonna qaýyn-qarbyz jóneltilse, Latviiaǵa 127 tonna qaýyn esporttalǵan. Al qalǵany el naryǵynda satylýda.
Al, búginde baqsha daqyldaryn egýde oblystaǵy eń iri agro aimaq bolyp sanalatyn Maqtaaral aýdanynyń turǵyndary 24 myń gektar jerge baqsha ónimin ekken. Diqandar egilgen qaýyn-qarbyzdan 74 myń tonnadan astam ónim jinap, saýdalaǵan. Olar ónimniń 70 paiyzyn shetelge, qalǵan 30 paiyzyn otandyq naryqqa shyǵarǵan.
Maqtaraldyq diqandar byltyr eskport pen ishki naryqty qosa eseptegende 7,6 milliard teńgeniń qaýyn-qarbyzyn satqan. Bul qarjynyń 70 paiyzy shet eldermen aradaǵy saýdadan túsken. Biyl egilgen qaýyn-qarbyzdyń kólemi 1000 gektarǵa artyq, sondyqtan da ónim kólemi men túsetin tabys byltyrǵyǵa qaraǵanda joǵary bolady dep kútilýde.
