Ońtústik Qazaqstanda oblys ákiminiń orynbasary Ulasbek Sádibekovtiń tóraǵalyǵymen oblystyq onomastika komissiiasynyń otyrysy ótti.
Basqosýǵa komissiia músheleri men aýdandyq, qalalyq mádeniet jáne tilderdi damytý bólimderiniń basshylary jáne til mamandary qatysty, dep habarlaidy QazAqparat tilshisi.
Búginde elimizde moraldyq, ideologiialyq turǵydan eskirgen ataýlardan arylý jáne tarihi ataýlardy jańǵyrtý baǵytynda tiisti jumystar júrgizilýde. Osy maqsatta uiymdastyrylǵan májiliske Arys, Shymkent qalalary men Báidibek, Qazyǵurt, Maqtaral, Otyrar, Ordabasy, Túlkibas aýdandaryndaǵy mekemeler jáne ákimshilik-aýmaqtyq birlikterdiń ataýlary qaraldy. Ondaǵy quramdas bólikterine ataý berý men ataýlaryn qaita ózgerti jóninde túsken 133 usynys talqylandy.
Komissiia músheleri usynystyń barlyǵyn oń qorytyndylap, zań aiasynda tiisti jumystardy jalǵastyrý jóninde sheshim qabyldady. Endi bul sheshimder jergilikti atqarýshy organdarǵa joldanady.
Qaralǵan usynystardyń ishinde mektepterdiń ataýyn ózgertý máseleleri de bar. Máselen, Arys qalasyndaǵy «MTF» shaǵyn jinaqty bastaýysh mektebi endi «Yntymaq» shaǵyn jinaqty bastaýysh mektebi, «Leshoz» shaǵyn jinaqty bastaýysh mektebi «Birlik» shaǵyn jinaqty bastaýysh mektebi, Báidibek aýdanyndaǵy «Komsomol» jalpy orta mektebi «Qarataý» jalpy orta mektebi dep qaita atalmaq. Tek oblystyq máslihattan qoldaý tapqan jaǵdaida Respýblikalyq onomastika komissiiasynyń qaraýyna engiziledi.
Sonymen birge, Maqtaral aýdanyndaǵy Jetisai qalasy men Myrzakent kentindegi birshama ýaqyttan beri synǵa iligip júrgen keńestik dáýirden qalǵan Sadovyi, Mehtýpik, Kirov, Komsomol, Oktiabr, Iýjnyi, Aptechnyi, DEÝ 300 siiaqty ataýlar joiylyp, kósheler ulttyq tanymǵa jaqyn ataýlarmen qaita atalatyn boldy.
Eske salaiyq, oblystyq onomastika komissiianyń biylǵy sáýir aiynda ótken otyrysynda osyndai 86 usynys qaralyp, usynystar biraýyzdan maquldanǵan bolatyn.
