Búgin Ońtústik Qazaqstan oblysy ákiminiń orynbasary Ulasbek Sádibekov Astana qalasynda ótken «EKSPO-2017» halyqaralyq mamandandyrylǵan kórmesine oblysymyzdan qatysqan erikti jastarmen kezdesti. Kezdesý barysynda Ulasbek Sádibekuly kórmeniń joǵary deńgeide ótkizilýine óz úlesterin qosqan erikti jastarǵa oblys ákiminiń Alǵys hatyn tabystap, arnaiy syilyqtarmen marapattady, dep habarlaidy "Ult aqparat" aimaq basshysynyń baspasóz qyzmetine silteme jasap.
Kórmeniń joǵary deńgeide ótýine atsalysqan jastarǵa alǵysyn bildirgen Ulasbek Sádibekuly álemdik sharanyń mańyzdylyǵyn da atap ótti.
«Jalpy, EKSPO kúnderinde 6 myńnan astam túrli deńgeidegi is-sharalar ótkizildi. EKSPO kórmesin ótkizý arqyly bizdiń el «jasyl» tehnologiialardy damytý ideiasyna berik ekenin taǵy da dáleldei tústi. Maýsymnyń 10 men qyrkúiektiń 9 aralyǵynda EKSPO-2017 halyqaralyq mamandandyrylǵan kórmesine 5 mln. astam adam kelgen. Onyń ishinde 151 myń oblys turǵyndary bolsa, sonyń ishindegi 15 myńy oblys jastary», - dedi Ulasbek Sádibekuly.
2015 jyldan bastap oblysymyzdyń barlyq aýdan, qalalarynda Astana «EKSPO-2017» halyqaralyq kórmesine eriktilerdi daiarlaý maqsatynda nasihattaý jumystary júrgizilip, kóptegen seminar-treningter ótkizildi. Jalpy shetelden keletin qonaqtar men týristerge elimiz boiynsha 3 myńnan asa erikti qyzmet kórsetse, sonyń 150-i bizdiń oblysymyzdyń jastary. Onyń ishinde: 73 ul, 77 qyz bala.
Naqtylap aitqanda, Shymkent qalasynan 100, Túrkistan qalasynan 37, Kentaý qalasynan 8, Maqtaral aýdanynan 5 jas iriktelip alynǵan bolatyn. Erikti jastar 30 maýsym kúni Astana qalasyna jolǵa shyǵyp, 1 shildeden - 5 tamyz kúni aralyǵynda iaǵni bir ai boiy shetelden kelgen qonaqtarǵa 3 tilde (qazaqsha, oryssha, aǵylshynsha) sapaly qyzmet kórsetken. 150 erikti jas negizinen qaýipsizdik, merekelik is-sharalar, biletteý, hattama, qoǵammen bailanys, seriktester men demeýshiler, EKSPO qalashyq, meditsina, akkreditatsiia sekildi baǵyttarda jumys istegen. Al, 15 erikti jas «EKSPO-2017» pavilionynda aqyly túrde jumys isteýge múmkindik alǵan.
