Ońtústik Qazaqstan oblysynda bes balasy bar jalǵyzbasty anaǵa qaiyrymdy jandar baspana salyp berdi. Kóp balaly otbasynyń baspanaly bolýyna Arys qalasynyń meshit qyzmetkerleri muryndyq bolǵan, dep habarlaidy QazAqparat tilshisi.
Jibek Nálibaeva osy kúnge deiin bes birdei perzentimen páter jaldap, talai aýyr kúnderdi basynan ótkizip kelipti. Úielmeli-súielmeli bes balasymen kóship-qonýdyń azabyn tartqan áiel aqyry aýyldaǵy imamdardan járdem suraǵan. Jalǵyzbasty qamkóńil ananyń jaǵdaiymen tanysqan din ókilderi jergilikti kásipkerler men qaltaly azamattardyń basyn qosyp, kómekke muqtaj januiaǵa baspana salyp berý týraly usynys tastaidy. Bul usynysty qup kórgen azamattar Arys qalasynyń «Naýryz» móltek aýdanynan úsh bólmeli turǵyn úi salyp berdi.
«Bireý shatyryn jabatyn shifryn berdi, bireý tsementyn berdi. Sóitip qurylys materialdary jinaldy. Sondai-aq, meshittiń jamaǵaty men qala imamdary da járdem berdi. «Kóp túkirse kól» demekshi, bári bárdei jumyldy. Osy kisige násip etipti úi alý, ár jerde kóship qonyp júrgende. Kásipkerler qoldap qoshtady, Alla razy bolsyn», - deidi Arys qalasynyń bas imamy Abdýkamal Ábdýkerim.
Jańa úidiń kiltin tabystaý rásimine halyq kóp jinaldy. Jańa úidiń kiltin alǵan ana osyndai qaiyrymdy istiń basynda júrgen azamattarǵa óz rizashylyǵyn bildirip, analyq alǵysyn aitty. Tipti qýanyshtan kózine jas alyp, mundai baspanaǵa qol jetkizý arman bolǵanyn aitady.
«Kilitti aldym. Úidiń ishine bala-shaǵamyzben kirip qýanyp jatyrmyz. Ásirese perzentterim qatty qýanyp otyr. Osy baspanaǵa atsalysqan azamattarymyz aman bolsyn. Olarǵa aitar alǵysym sheksiz. Men siiaqty kóp balaly analarǵa, jaǵdaiy tómen otbasylarǵa da osyndai qýanysh tiler edim», - deidi Jibek Nálibaeva.
Aita keteiik, toǵyz joldyń torabynda ornalasqan shaǵyn qalada buǵan deiin jaldamaly páterlerdi panalap kelgen jalǵyz basty anaǵa úi berilgen bolatyn. Ol kezde de áleýmettiń álsiz tobyna meshit imamdary men jergilikti kásipkerler kómek qolyn sozdy. Osylaisha jetimin jylatpaǵan, jesirin jerge qaratpaǵan el azamattary qaiyrymdylyq jasaýdy dástúrge ainaldyryp keledi.
