Búgin Ońtústik Qazaqstan oblysynyń ákimi J.Túimebaev selektorlyq rejimde ótken apparattyq jiynda azyq-túlik taýarlary baǵalaryn turaqtandyrý jáne taýar óndirýshiler men diqandarǵa óz ónimderin saýdalaýǵa múmkindik beretin áleýmettik bazar ashýdy aýdan, qala ákimderine tapsyrdy, dep habarlaidy "Ult aqparat" aimaq basshysynyń baspasóz qyzmetine silteme jasap.
«Áleýmettik mańyzy bar azyq-túlik taýar baǵalarynyń ósýine jol bermeý maqsatynda óńirde bir ai kóleminde áleýmettik bazarlar ashýymyz qajet. Ol úshin Shymkentten 1-1,5 gektar jer qaralyp, talapqa sai jasaqtalýyn, al iri aýdandar 70 sottyq, kishi aýdandar 50 sottyq jer bólip az ýaqyttyń ishinde taýar óndirýshilerge óz ónimderin satýǵa múmkindik jasalý kerek»,-dedi ákim. Sonymen qatar, aimaq basshysy áleýmettik bazarlarda ónimder aýyl sharýashylyq jármeńkelerine básekelesetindikten jáne taýar óndirýshilermen tikelei qarym-qatynas jasaý arqyly ónim baǵasyn tómendetýge múmkindik týatynyn atap ótti.
Májiliste sóz alǵan oblystyq kásipkerlik, indýstriialdy-innovatsiialyq damý jáne týrizm basqarmasy basshysynyń orynbasary Baǵlan Jumashbekov jalpy obysta áleýmettik azyq-túlik taýarlary baǵalarynyń kúrt ósimi oryn almaǵanyn jáne taýarlarǵa jetispeýshik baiqalmaitynyn málim etti.
Onyń aitýynsha, baǵany turaqtandyrý maqsatynda oblys aýmaǵyndaǵy saýda oryndarynyń basshylarymen baǵany negizsiz ósirmeý jóninde memorandýmǵa qol qoiylǵan. Sonymen qatar, aýylsharýashylyq taýarlarynyń jármeńkesin ótkizý arqyly baǵa turaqtylyǵy saqtalýda. Máselen, jyl basynan beri óńirde 77 jármeńke ótkizilgen bolsa, onda jalpy sommasy 639,3 mln. teńge bolatyn 842,1 tonna azyq-túlik tarýarlary satylǵan. Iaǵni, jergilikti taýar óndirýshilerdiń jármeńkedegi tikelei satylymynyń esebinen baǵalar naryqtaǵydan tómen bolǵan. Budan bólek, ol ÁKK turaqtandyrý qoryna azyq-túlik taýarlaryn jetkizý boiynsha jalpy sommasy 752,3 mln teńgeni quraityn fiýcherlik/forvardtyq kelisim sharttarǵa qol qoiylǵanyn jetkizdi.
Aita keteiik, búgingi tańda turaqtandyrý qorynda – 1 myń tonna qant, 2 myń tonna kartop, 1 myń tonna piiaz, sábiz 1 200 tonna, kúrish 70 tonna, al siyr eti 200 jáne 30 tonna makaron ónimderi bar. Munan bólek, qoimada ótken jyly alynǵan taýarlardan qalǵan 2500 tonna un, 1 244 tonna qant jáne 69,1 tonna kúrish saqtalýda.
Jiyndy qorytyndylaǵan oblys ákimi azyq-túlik baǵalarynyń ósýi halyqty alańdatatyn eń mańyzdy másele ekenin aityp, árbir aýdan, qala ákimderine turǵyndardyń kúndelikti tutynatyn taýar baǵalarynyń ósýine jol bermeýdi nyqtap tapsyrdy.
