Ońtústik Qazaqstan oblysynda «Órleý» baǵdarlamasyn iske asyrý jumystary qarqyn aldy. Bir ǵana Maqtaral aýdanynda biyl atalǵan joba aiasynda respýblikalyq biýdjetten 963 million teńge, jergilikti biýdjetten 600 million teńge qarjy bólingen. Bul týraly Óńirlik kommýnikatsiia ortalyǵy uiymdastyrǵan press týr barysynda Maqtaral aýdanynyń ákiminiń orynbasary Maqsat Joldasbekov málim etti, dep habarlaidy "Ult aqparat".
Maqsat Joldasbekovtyń sózinshe, qomaqty qarjylar bólinýiniń arqasynda 1439 otbasy, iaǵni 15493 adam óz kásipterin ashyp, tirligin dóńgeletip otyr.
«Órleý» baǵdarlamasynyń tiimdiligin kórgen kópbalaly ananyń biri - Shynar Sattarova memleketten 450 myń teńge demeý qarjy alyp, Jetisai qalasynan dámhana ashypty. Qazir munda 5 adam jumyspen qamtylǵan.
«Memlekettiń «Órleý» jobasyn qolǵa alǵany biz sekildi kópbalaly analarǵa mol múmkindik berip otyr. Men óz basym osy jobany paidalanyp, kásip ashýǵa bel býdym. Ázirge nátijesi jaman emes. Halyqqa sapaly qyzmet kórsetip, alǵashqy tabystarymyzdy kóre bastadyq», - deidi Shynar Sattarova.
Munan soń BAQ ókilderi Birlik aýylyna at basyn buryp, Elbasynyń «Bolashaqqa baǵdar: rýhani jańǵyrý» maqalasynda aitylǵan «Týǵan jer» baǵdarlamasy aiasynda ashylǵan "Jastar" sport kesheniniń jumysymen tanysty. Sutanbek Qojanov mektebiniń bazasynda ornalasqan keshenniń qaita qurylymdaý jumystaryn osy aýyldyń týmasy kásipker Abyz Alipov óz qarjysyna júrgizipti. Munda aýyl jastary bir mezgilde sporttyń voleibol, basketbol, fýtbol túrlerimen ainalysa alady. Aldaǵy ýaqytta kásipker osy aýyldan sý sporty keshenin salyp berýdi josparlap otyr.
Budan bólek, kásipker aýyldyń kire berisine qaqpa turǵyzyp, baspanasyz júrgen jaǵdaiy tómen otbasyǵa quny 5 million teńgelik jańa turǵyn úi salyp beripti.
