Halyqaralyq qarttar kúnine orai oblysta aldyńǵy býyn ókilderine qurmet-iltipat kórsetý sharalary odan ári jalǵasyn tabýda. Ońtústik Qazaqstan oblysynyń ákimi Janseiit Túimebaev qazynaly qariialardy quttyqtaý úshin oblystyq ardagerler keńesine arnaiy at basyn burdy, dep habarlaidy QazAqparat tilshisi.
Aimaq basshysy ortalyq saiabaqqa jinalǵan el aǵalarymen kezdesip, olardyń hal-jaǵdaiyn surady. «Qarty bar úidiń qazynasy bar» ekenin atap ótip, qoǵam ómirindegi ardagerler atqaryp otyrǵan aýqymdy jumystardy sóz etti. Eldiń birligi, turaqtylyq, urpaqtar sabaqtastyǵy týraly oiyn ortaǵa saldy.
«Ońtústik óńirinde oblysta búginde 200 myńnan asa zeinetker turady. 218 Uly Otan soǵysynyń ardageri bar. Olardyń arasynda keshegi kúni el qorǵaǵan erler de, sharýashylyqtyń san-salasynda eńbek etken kóptegen mamandyq ieleri de kezdesedi. Ardagerler óz ýaqytynda boiyndaǵy bilimi men biligin, kúsh-jigerin el igiligi úshin jumsady, Elbasymyz atap kórsetkendei endi olardyń qai-qaisysy da umyt qalmaýy tiis», - dedi Janseiit Túimebaev.
Oblys basshysy aqsaqaldarǵa quttyqtaý sózin aityp, otbasylyq qundylyqtar, bala tárbiesi jónindegi eńbekteri úshin jyly lebizin arnady.
«Mynaý tirshilikte, jalpy qoǵamda sizderdiń alatyn oryndaryńyz erekshe. Sizder ońtústik óńiriniń damýyna, elimizdiń egemendigi úshin airyqsha eńbek sińirdińizder. Sizderdi bizdiń altyn qazynamyz dep esepteimiz. Sondyqtan da aqyl-keńesterińiz, ómirlik tájiribelerińiz keiingi jastar úshin úlgi ónege», - dedi oblys basshysy.
Aita keteiik, oblystaǵy zeinetkerlerdiń 600-ge jýyǵy jasy 100-den asqan ata-ájeler, 80-nen astamy - jalǵyzilikti qariialar. Qýantarlyǵy sol, qarttarǵa degen qamqorlyq jyldan jylǵa artyp keledi. Máselen, jalǵyzbasty qariialarǵa ai saiyn bir ailyq eseptik kórsetkish esebinde qarjylai kómek beriledi, 10 myńǵa jýyq qart búginde kommýnaldyq qyzmetti tóleýden bosatylyp, qoǵamdyq kólikterde tegin júrýge múmkindik alyp otyr. Onymen qosa, 3 myńnan asa qariiany túrli basylymdarǵa tegin jazdyrý uiymdastyrylǵan.
