Ońtústik Qazaqstan oblysynyń ákimi Janseiit Túimebaev Ulystyń uly kúni – Naýryz merekesi qarsańynda Saryaǵash aýdany Abai eldi mekeninde bolyp, el aǵalarymen, aýyl turǵyndarymen kezdesti. Basqosýda óńir basshysy Naýryz – tatýlyqqa bastaityn meiram ekenin aita kele, turǵyndardy yntymaqpen birlese eńbek etýge shaqyrdy, dep habarlady oblys ákimdiginiń baspasóz qyzmeti.
"Memleket retinde qalyptasyp, Táýelsizdikke qol jetkizgenine shirek ǵasyr ǵana bolǵan bizge tatýlyq pen yntymaq óte qajet. Saryaǵash – shekaralyq aimaqta ornalasqan strategiialyq aýdan. Mundaǵy halyqtyń ósimi óte joǵary. Sondyqtan da eldiń áleýmettik jaǵdaiyn jaqsartý maqsatynda Elbasymyzdyń qoldaýymen júieli jumystar atqarylýda. Munyń bárine eldegi turaqtylyq pen birliktiń arqasynda qol jetkizip otyrmyz. Osy jetistikterimizdi el aǵalary men turǵyndary qoldap, qýattap otyrsa, budan da joǵary jetistikterge qol jetkizýge múmkindigimiz mol", – dedi Janseiit Qanseiituly.
Sondai-aq, oblys ákimi kezdesý barysynda Abai aýylynda bolǵan oqiǵaǵa da toqtaldy. Bul máselemen tiisti quzyrly organdardyń ainalysyp jatqanyn aita kele, bolshaqta mundai jaǵdai qaitalanbaýy úshin el aǵalary, aýyl bileri birigip júieli túrde jumys isteý kerek ekenin málimdedi.
Kezdesýde sóz alǵan aýyl bii M.Ilesbekov el ishindegi túrli máselelerdiń der kezinde sheshilýine el bolyp atsalysyp, jumylý qajettigin jetkizdi.
Jiyn sońynda oblys basshysy saryaǵashtyq turǵyndardy Naýryz merekesimen quttyqtap, elimizde tynyshtyq pen berekeniń saltanat qurýyn tiledi.
