Búgin Májilis spikeri Nurlan Nyǵmatýlinniń tóraǵalyǵymen Palatanyń jalpy otyrysy ótti. Onda depýtattar «Tehnikalyq retteý» týraly zań jobasyn birinshi oqylymda maquldady, dep habarlaidy "Ult aqparat" tómengi palatanyń baspasóz qyzmetine silteme jasap.
Atalǵan mańyzdy qujatty talqylaý barysynda Májilis tóraǵasy jańa zań jobasynyń salmaqty tustaryna erekshe nazar aýdardy. Ol bul zań jobasynyń qazaqstandyq naryqty sapasyz taýarlardan qorǵaýǵa baǵyttalǵanyn aita kelip: «Eń bastysy, ónim qaýipsiz bolý kerek. Basqa máselelerdi, mysaly - ónimge markirovka jasaý, ol jaǵdaidy kásipkerlerdiń ózderi sheshetin múmkindigi bar. Ol úshin tovardy qaitarýǵa, nemese ótkizbeýge jol bermeý kerek. Sebebi, bul - kásipkerler úshin óte úlken shyǵyn», - dep atap ótti.
Endi osy zań jobasyna sáikes, memlekettik baqylaý ónimdi ótkizý satysynda ǵana emes, ony elimizdiń aýmaǵyna ákelgenge deiin júrgizetin bolady.
«Jasyratyny joq, osyǵan deiin basqasha boldy. Mysaly, kez kelgen ónimdi biz eń aldymen elge kirgizemiz de, sodan keiin tekseremiz. Qaýipti jaǵdai bolsa, sonda ǵana anyqtaý bastalady. Endi ónim Qazaqstanǵa kirmei turyp, memlekettik baqylaýdan ótedi. Qaýipti jaǵdai anyqtalsa, birden ol taýardy árine, qaitaramyz. Bul - óte mańyzdy, óte qajetti qadam. Sondyqtan bul normany mindetti túrde qoldaýymyz kerek», - dedi Nurlan Nyǵmatýlin.
Palata spikeriniń pikirinshe, zań jobasyna engizilgen túzetýler tutynýshylardy qaýipti taýarlardan qorǵaýdy kúsheitedi.
Sonymen qatar otyrys barysynda depýtattar jaýapty memlekettik organnyń basshysyna birqatar suraqtaryn qoidy.
Eske sala keteiik, zań jobasy Memleket basshysynyń jańa redaktsiiadaǵy tehnikalyq retteý týraly zańdy daiyndaý qajettigi týraly tapsyrmasyn iske asyrý maqsatynda ázirlendi.
