Májilis depýtattarynyń aimaqtarǵa is-sapary barysynda Palata Tóraǵasy Nurlan Nyǵmatýlin Aqmola oblysynyń ortalyǵy - Kókshetaý qalasyna bardy, dep habarlaidy "Ult aqparat".
Eń áýeli «Qazaqstan Agro Innovatsiialyq Korporatsiia» jaýapkershiligi shekteýli seriktestiginde bolǵan Májilis Spikeri kópsalaly aýyl sharýashylyǵy tehnikasyn qurastyrý jaiymen tanysty. Munda aýyl sharýashylyǵy jáne kommýnaldyq sharýashylyqqa qajetti tehnika qurastyrylady. Jalpy alańy 6 gektardan astam jerdi qamtyǵan kásiporyn búginde innovatsiialyq talapqa sai jemisti jumys atqaryp keledi.
Sapar barysynda N. Nyǵmatýlin «Kókshetaý mineral sýlary» kásiporny jumysshylarymen kezdesti. Óz sózinde Májilis Tóraǵasy babalarymyz sary jailaý ataǵan, sulý Kókshetaý elimizdegi tarihy bai qalalardyń biri ekenin, Elbasynyń turaqty qamqorlyǵynyń arqasynda jyl saiyn kórkeiip, búgingi kúni bolashaǵy jarqyn, maqsaty aiqyn, irgeli mekenge ainalǵanyn atap ótti.
Máselen, Aqmola oblysy elimizdegi iri astyqty ólke retinde Qazaqstan boiynsha bidaidyń tórtten bir bóligin óndirip, árbir otbasynyń, árbir shańyraqtyń dastarhanyn as atasy – qasietti nanmen toltyryp otyr.
Búginde álemniń 26 eline astyq eksporttap, Qazaqstanymyzdyń ekonomikalyq damýyna da úlken úles qosýda.
Bul oblysta byltyr ǵana Elbasynyń qatysýymen jańa indýstrialdy–tehnologiialyq park ashyldy. Elimizdiń indýstriialandyrý kartasy boiynsha kóptegen jańa jobalar qolǵa alynyp, myńdaǵan jańa jumys oryndaryn ashýǵa jaǵdai jasaldy.
QR Parlamenti Májilisi Apparatynyń baspasóz qyzmeti málim etkendei, jalpy, bul oblys ónerkásip, aýylsharýashylyǵy, investitsiialar tartý jáne turǵyn-úi qurlysy salalarynda joǵary jetistikterge jetip, Qazaqstanymyzdaǵy agrarlyq-indýstriialyq aimaqqa ainalyp keledi.
Nurlan Nyǵmatýlin atap ótkendei, kásipkerlik salasynda da myńdaǵan nysan ashylǵan. Sonyń ishinde, táýelsizdiktiń qurdasy sanalatyn «Kókshetaý mineral sýlary» zaýyty 100-ge jýyq sapaly ári tabiǵi ónim shyǵaryp, jyl saiyn básekege qabileti artyp keledi.
Óz sózinde Májilis Spikeri Qazaqstanymyzdyń 26 jyl ishindegi tabystaryna toqtalyp, bolashaq josparlarmen bólisti. Sondai-aq, Májilistiń sessiia bastalǵannan bergi zań shyǵarmashylyq qyzmetine qatysty aqparattarmen bólisti.
Májilis Tóraǵasynyń aitýynsha Palata óz qyzmetinde Elbasynyń «Qazaqstan - 2050» damý baǵdarlamasyn, «100 naqty qadam» Ult Josparyn, «Nurly jer», «Nurly jol» memlekettik baǵdarlamalaryn zań turǵysynan qamtamasyz etýge basa kóńil bóledi. Osy rette Májilis qaraýynda sessiia bastalǵanda barlyǵy 80 zań jobasy bolsa, onyń 42-si maquldanǵan. 12 zań jobasyna depýtattar ózderi bastamashy boldy. Búgingi kúni 33 Zańǵa Prezidenttiń qoly qoiylyp, óz kúshine endi.
Osydan keiin Májilis Spikeri «Avitsenna» emdik-profilaktikalyq mekemesinde bolyp, aq halattylarmen kezdesti.
Dárigerler aldynda elimizdiń meditsina salasyndaǵy jetistikter jaiynda jáne Elbasy júktegen bolashaq josparlar týrasynda baiandady.
«Búgin biz Aqmola oblysynda aýyl halqymen jáne ártúrli sala mamandarymen kezdesip, kóptegen suraqtardy talqyladyq. Ásirese, Elbasymyz Nursultan Ábishuly Nazarbaev aldymyzǵa qoiǵan maqsattar men mindetterge basa kóńil bólindi. Kóptegen usynys, kóptegen pikir, sonyń ishinde problemalar da aityldy. Olardyń barlyǵy aldaǵy zań shyǵarý jumysymyzda eskeriletin bolady»,-dedi Kókshetaýǵa sapary barysynda N. Nyǵmatýlin.
Palata Spikeriniń pikirinshe, Májilis depýtattarynyń aimaqtarǵa sapary, halyq úshin de, depýtattar úshin de óte mańyzdy. Óitkeni, bul kezdesýler ortaq máselelerdi tikelei talqylap, tyǵyz jumys jasaýǵa múmkindik beredi.
.jpeg)