Parlament Senatynyń depýtaty Nurtóre Júsip demalys oryndarynda shashylǵan qoqys máselesin kóterip, tazalyq tártibin jolǵa qoiýýdy surap, Úkimet basshysyna depýtattyq saýal joldady, dep habarlaidy "Ult aqparat".
«Býrabaidyń bir óziniń Shveitsariiadan nesi kem? Osy Býrabaidyń jalpyulttyq kýrort atanǵanyna biyl 100 jyl tolady. 100 jyldyq tarihynda talai qurylymdyq ózgerister boldy. 2000 jyly Qazaqstan Úkimeti óz qaýlysymen «Býrabai» memlekettik-ulttyq parki degen mekeme qurdy. Qazir «Býrabai» Qazaqstan Prezidenti Is basqarmasynyń qaraýyna qaraidy», - dedi Nurtóre Júsip Parlament Senatynyń otyrysynda.
Depýtattyń aitýynsha, osy Býrabaida qaptaǵan qoqys, shashylǵan zattar, plastikalyq bótelke, ýmajdalǵan paket, kóldiń las sýy – onyń kórkin ketirip tur.
«Qandai keremet demalys aimaǵy! Biraq qadirin nege bilmeimiz? Memlekettik-ulttyq tabiǵi parktiń tazalyqqa jaýapty tiisti bólimderi men qurylymdary da bar. Biraq qoqystan aiaq alyp júre almaityn jaǵdaiǵa jettik. Býrabaida demalýshylar tastaǵan qoqystar týraly áleýmettik jelide taralǵan beinerolik sonyń dáleli. Bul qalai? Jalpy, tek Býrabai emes, Qazaqstannyń kez kelgen óńirine barsaq, ne kóp – qoqys kóp. Tastaityn da ózimiz, lastaityn da ózimiz. «Týǵan tabiǵatymyzdy aialap, kúte almaityndai basymyzǵa ne kún týdy? Sonshama lastaityndai, sonshama qorlaityndai týǵan jerimizdiń ne jazyǵy bar?» degen suraq týady. Jer bizdiki! El bizdiki! Qazaqstanǵa shetelden oralǵan qandas aqsaqalymyzdyń biri ushaqtan túse salyp, qara jerdi súigen sáti esterińizde bar ma? Týǵan jerge degen osyndai ińkárlik qazir nege joq bizde?», - deidi depýtat.
Senator qazaq halqy osy eldegi, jerdegi bárine de jaýapty ult ekenin atap ótti.
«Tabiǵatty taza ustaý úshin janymyzdy taza ustaiyq. Tazalyq mádenietin qalyptastyraiyq. Dalamyz da, qalamyz da taza bolsyn. Týǵan jerimizdi anamyzdai ardaqtaý – ózimizge bailanysty emes pe!? Ulttyq namysymyz qaida? El bolýǵa ultaraqtai jer tappai júrgen qanshama jurt bar álemde. Biz bardyń qadirin nege bilmeimiz?» - dedi senator.
Osy máseleni tize kele Nurtóre Júsip bul rette Kanadanyń tártibin basshylyqqa alý kerektigin jetkizdi. Ol elde ekologiialyq talaptar qatań saqtalady. Kanadada «Jasyl jospar» degen ulttyq baǵdarlama qabyldanǵan.
«Tazalyq máselesin ulttyq qundylyqtar qataryna shyǵarý kerek. Memlekettik turǵyda shuǵyl túrde tazalyqty saqtaý, baqylaý, retteý tetikterin jetildirý qajettigi bilinip otyr. Sizden osy máseleni qarap, Úkimettiń tiisti qurylymdary arqyly is-sharalar keshenin jedel qabyldaýdy suraimyz», - dedi Nurtóre Júsip.
