Jambyl aýdanynda eki balasyna aliment tóleýden jaltarǵan 30 jastaǵy azamat úsh jyl boiy jinalǵan 4,1 mln teńge bereshegin tolyq ótedi. Buǵan prokýratýra qabyldaǵan sharalar sebep bolǵan, dep habarlaidy ult.kz.
Prokýratýranyń málimetinshe, er adamnyń aliment tóleýge qarjylyq múmkindigi bolǵan. Alaida ol 2023 jyldan beri tabysyn jasyryp, eki kámeletke tolmaǵan balasyna qarajat aýdarýdan qasaqana jaltarǵan. Sonyń saldarynan milliondaǵan teńge qaryz jinalǵan.
2026 jylǵy qyrkúiekte aýdan prokýratýrasynyń bastamasymen politsiia Qylmystyq kodekstiń 139-baby boiynsha sotqa deiingi tergep-tekserýdi bastaǵan. Tergeý barysynda boryshker aliment beresheginiń bir bóligin ótegen.
Keiin taraptar mediatsiialyq kelisimge keldi. Kelisim boiynsha azamat aldaǵy ýaqytta alimentti ýaqytyly ári tolyq tóleýge mindettendi.
19 qazanda taraptardyń tatýlasýyna bailanysty sotqa deiingi tergep-tekserý aqtamaityn negizder boiynsha toqtatyldy.
Prokýratýranyń habarlaýynsha, qabyldanǵan sharalar nátijesinde balalardyń buzylǵan quqyqtary qalpyna keltirilip, sot sheshiminiń oryndalýy qamtamasyz etildi.
